İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 138 Hüküm no: 102 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber esnafından Seyyid Mustafa Usta b. Abdullah’ın berber dükkânını Halil Alemdar b. Mahmud’a sattığı Berber Mahmiye-i İstanbul’da kâin berber esnâfından es-Seyyid Mustafa Usta b. Abdullah nâm kimesne meclis-i şer‘-i şerîf-i enverde işbu bâ‘isü’l-kitâb Halil Alemdar b. Mahmud nâm kimesne muvâcehesinde ikrâr-ı tam ve takrîr-i kelâm edip mahmiye-i İstanbul’da Gedik Paşa Hamamı Külhan kapısı civârında manav ve attâr dükkânları beynlerinde kâin bir bâb berber dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet-i şer‘iye müstakıllen yedimde emvâlim olan beş ustura ve bir bileği taşı ve üç peşgîr ve bir kazgan ve bir mikrâs ve bir mir’ât ve bir kayış ve sâir âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm Halil Alemdar’a iki bin beş yüz guruşa bey‘ ve temlik ve teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin beş yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i muharrere-i mezkûrede benim kat‘a alâka ve medhalim kalmayup merkūm Halil Alemdar’ın emvâl-i müşterâtı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 25 S sene [1]238. Şühûdü’l-hâl: Kethudâ vekîli İbrahim Ağa, Şeyh Musa Efendi, Yiğitbaşı Nuri, Çavuş Mustafa Usta.