İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 160 Hüküm no: 127 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafından Kostandi v. Yani’nin bakkal dükkânını Kostandi v. Dimo’ya sattığı Bakkāl Mahmiye-i İstanbul’da kâin bakkāl esnâfından Kostandi v. Yani nâm zimmî meclis-i şer‘-i hatîr-i lâzımü’t-tevkīrde esnâf-ı merkūmeden işbu hâmilü’r-rakīm diğer Kostandi v. Dimo nâm zimmî muvâcehesinde ikrâr-ı tam ve takrîr-i kelâm edip mahmiye-i İstanbul hısnı ebvâbından ahırkapı hâricinde câmi‘-i şerîf tahtında vâki‘ Ömer Ağa dükkânı demekle meşhûr ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi işbu hâzır bi’l-meclis Çalık Dimo v. Atam ve yirmi iki sehmi kezâlik hâzır bi’l-meclis Yani v. Dimitri ve yirmi dört sehmi kezâlik hâzır bi’l-meclis Yorgi v. Yani nâm zimmîler her birinin yedlerinde iştirâken ve şâyi‘an mâlları ve mülkleri ve mâ‘adâ on dört sehm hisse-i şâyi‘ası akd-i âtiyyü’z-zikrin sudûruna değin benim yedimde mâlım ve mülküm olmağın ben âlât-ı mezkûreden ber-vech-i mübeyyen mâlik olduğum on dört sehm hisse-i şâyi‘a-i mezkûremi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleri ve şerîklerim hâzırûn-ı mersûmunun izin ve icâzetleriyle bin yüz doksan iki guruşa [30b] mersûm diğer Kostandi zimmîye bey‘ ve temlik ve vech-i lâyıkı üzere teslîm eylediğimde ol dahi yedimden ber-vech [-i muharrer] iştirâ ve temellük ve tesellüm ve kabz ü kabûl ve semeni olan meblağ-ı merkūm bin yüz doksan iki guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i ma‘lûmede benim kat‘a alâka ve medhalim kalmayup on dört sehm hisse-i şâyi‘ası mersûm diğer Kostandi zimmînin mâl-ı müşterâsı ve hakk-ı sırfı olmuşdur dedikde hâzırûn-ı mersûmundan her biri ile mersûm diğer Kostandi zimmî ba‘de’t-tasdîki’l-mu‘teber mâ-vaka‘a [bi’t-taleb ketb olundu.] Fî 13 Ra sene [1]238. Şühûdü’l-hâl: Pazarbaşı Süleyman, Bölükbaşı Abdi, Kâtib Ahmed Efendi.