İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 224 Hüküm no: 195 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı esnafından Said Ağa b. Mustafa’nın mâlik olduğu sandalcı destgâhını Seyyid Ahmed Efendi b. Mustafa’ya sattığı Sandalcı aded 2 Hudâvendigâr-ı esbak cennet-mekân firdevs-âşiyân merhûm Sultan Selim Han -tâbe serâhû- hazretlerinin medîne-i Üsküdar’da vâki‘ Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından mâ‘adâ Âsitâne-i aliyye ve bilâd-ı selâse ve tevâbi‘lerinde vâki‘ bi’l-cümle sandalcı destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde tahrîr ü takrîr ve bir aded destgâh iki yüz guruşdan ziyâde semen ile bey‘ ü şirâ olunmak bâ-emr-i âlî memnû‘ olduğu şurût-ı mer‘iyesinden olduğuna binâen sandalcı esnâfından Said Ağa b. Mustafa nâm kimesne meclis-i şer‘-i şerîf-i enverde beş aded destgâha mâlik olan işbu bâ‘isü’l-kitâb es-Seyyid Ahmed Efendi b. el-Hâc Mustafa << mahzarında ikrâr-ı tam ve takrîr-i kelâm edip >> nâm kimesne mahzarında ikrâr-ı tam ve takrîr-i kelâm edip bâlâda zikr ve beyân olunan destgâhlardan akd-i âti’z-zikrin sudûruna değin yedimde mâlım ve mülküm olan iki aded destgâhımı tarafeynden îcâb ve kabûlü hâvî şurût-ı müfsideden ârî bey‘-i bât-ı sahîh-i şer‘î ile merkūm es-Seyyid Ahmed Efendi’ye dört yüz guruşa bey‘ ve temlik ve teslîm eylediğimde << ben dahi yedinden ahz ü kabz edip >> ol dahi yedimden iştirâ ve temellük ve tesellüm ve kabz ü kabûl ve semenleri olan meblağ-ı merkūm dört yüz guruşu bana def‘ ü teslîm eylediğinde ben dahi yedinden ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan iki aded destgâhda benim kat‘a alâka ve medhalim kalmayup mezbûr es-Seyyid Ahmed Efendi’nin mâlı ve mülkü olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 25 Ca sene 1238. Şühûdü’l-hâl: Eş-şâhidûne’s-sâbıkūn.