.:: İstanbul Kadı Sicilleri ::.


İstanbul Mahkemesi 148 Numaralı Sicil (H. 1241-1242 / M. 1826-1827)
cilt: 90, sayfa: 81
Hüküm no: 31
Orijinal metin no: [7a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Halil Ağa b. Süleyman ile ev tamirinden alacaklısı Vartan v. Kirkor’un 200 guruşa sulh oldukları

Husûs ile menzil ta‘mîrinden 200 guruşa sulh

Ma‘rûz

Sâdır olan fermân-ı âlîlerine imtisâlen zikri âtî husûsun mahâllinde ketb ü tahrîri’çün cânib-i şerî‘at-ı garrâdan me’zûnen irsâl olunan Kâtib es-Seyyid Ahmed Rıza Efendi dâ‘îleri hâssa mi‘mârı hulefâsından Derviş Ahmed ve Mehmed Râşid Halîfeler ile İstanbul’da Şeyh Ebulvefâ kurbünde Mollagürânî mahallesinde vâki‘ Berber Halil Ağa b. Süleyman nâm kimesnenin mutasarrıf olduğu ma‘lûmü’l-hudûd bir bâb menzile varıp mahalle-i mezbûre ahâlîsinden Hâfız Mehmed Efendi b. Mahmud ve Atîk Vâlide Sultân Vakfı’nın kâtibi Mehmed Emin Efendi b. Mehmed Emin ve kethudâ bey Karakulağ-ı esbak Mehmed Emin Ağa b. Hüseyin ve Ebulfeth Sultân Mehmed Han -aleyhi’r-rahmetü ve’l-gufrân- Hazretleri Câmi‘-i şerîfi kurşuncusu Hâfız Mustafa Ağa b. el-Hâc Hasan ve Ebûbekir Ağa b. Ömer nâm kimesneler huzûrlarında akd-i meclis-i şer‘-i nebevî ettikde Âsitâne-i aliyyede vâki‘ neccâr tâifesinin <> perâkende kolu neferâtından sahib-i arzuhâl Vartan v. Kirkor nâm zimmî meclis-i <<şer‘-i>> ma‘kūd-ı mezkûrda derûn-ı arzuhâlde mezkûru’l-ism merkūm Halil Ağa muvâcehesinde ben târih-i i‘lâmdan dört sene mukaddem mezbûr Halil Ağa’nın bi-şartı’r-rücû‘ emriyle mutasarrıf olduğu menzil-i mezkûrunu harâb olduğu hâlde hedm-birle enkāz-ı atîkası mahlût olarak mâlımdan dört bin beş yüz guruş sarfla müceddeden iki direk bir bâb menzil binâ ve inşâ ve tekmîl eylediğimden sonra masrûfum olan meblağ-ı mezkûrun iki bin beş yüz guruşunu mezbûr Halil Ağa ceste ceste bana edâ ve teslîm ben dahi yedinden ahz ü kabz ve üç yüz otuz guruşunu menzil-i merkūma isti‘mâl eylediğim sâlifü’z-zikr enkāz-ı atîka için bi’r-rızâ tenzîl etmemle bâkīsi olan bin altı yüz yetmiş guruşu mezbûr Halil Ağa’dan bi’l-muvâcehe hâlâ taleb ederim deyü tesâddî eylediğim da‘vâmdan bâ-tavassut-ı muslihîn merkūm Halil Ağa ile bi’t-tav‘ ve’r-rızâ iki yüz guruş üzerine sulh olduğumda ol dahi sulh-ı mezkûru kabûl ve bedel-i sulh-ı merkūm iki yüz guruşu işbu meclis-i <<şer‘de>> ma‘kūd-ı mezkûrda bana def‘ ü teslîm ben dahi yedinden tamamen ahz ü kabz etmemle mâ‘adâya ve bi’l-cümle husûs-ı mezkûra ve işbu târih-i i‘lâma gelince sâir beynimizde cereyân eden cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve ıskāt ve her birimiz ber-vech-i muharrer âharın ibrâsını kabûl eyledik deyü ikrâr ve tasdîklerini kâtib-i merkūm mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘de <> tarafeyn hazır oldukları hâlde tasdîklerine mukārin alâ-vukū‘ihî inhâ ve takrîr eylediği İstanbul Mahkemesi’nden huzûr.

Fî 23 M sene 1242

Nüshateyn