İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 115 Hüküm no: 67 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. 65440 baş Rumeli koyun ve keçisinin dağıtımı 65440 re’s Rumeli ağnam ve keçi tevzî‘i Ma‘rûz Âsitâne-i aliyye sekenesinin akvât-ı yevmiyeleri’çün işbu sene-i mübârekede Rumeli cânibinden cem‘an altmış beş bin dört yüz kırk re’s ağnam ve keçi getiren celeb tâifesinden Rahovalı Mustafa ve Mehmed ve Mahmud ve Hasan ve Ömer ve diğer Mehmed ve Mehmed Pehlivan ve Ahmed ve diğer Mehmed ve Hacı Abdullah ve Üstüyan ve Dilko ve Nedlo ve Todori ve İskaro ve Neşo ve el-Hâc Mehmed Ağa ve Salih Beşe ve Mihal ve Nikola ve Todori ve Kiro ve diğer Todori ve Lazko [ve] Dimitri ve Melo ve Ahmed ve Hasan ve Niyo ve Necil ve Panço ve Osman Bey nâm Müslim ve re‘âyâ meclis-i şer‘-i münîrde izzetlü kasabbaşı ağa tarafından mürsel kasablar kethudâsı el-Hâc Hasan Ağa ve sâir kasab ustaları muvâcehelerinde bu def‘a ber-vech-i bâlâ getirdiğimiz ağnam ve keçinin sakatları’çün nesne mutâlebe etmeyerek beher vakıyye lühûmunu narh-ı cârîsi üzre yirmi yedişer paraya kassâbâna bey‘a onlar dahi ber-mu‘tâd Perşembe ve Cum‘a günlerini ta‘tîl ederek haftada beş gün Rumeli ve beş gün dahi Anadolu ağnamını tevzî‘a ve yevm-i tevzî‘den elli bir gün mürûrunda yaftalarımızı ve doksan bir gün tamamında semenlerini bize edâya ve beher vakıyye lahm-ı ganemi üçer para fâide ile ibâdullâha bey‘a her birimiz ta‘ahhüd eyledik deyü takrîrlerini kasab esnâfı merkūmûn tasdîk eyledikleri İstanbul Mahkemesi’nden huzûr. Fî 19 min-S sene 1242