İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 127 Hüküm no: 79 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fâtıma Şefika bt. Mehmed Sadık’ın kiracı olduğu bakkal dükkânın yandığı, sahiplerini yeniden inşaya zorladığı Bakkal dükkânını mülk sahibine inşâ eyle deyü cebr da‘vâsı meşrû‘a olmadığı Ma‘rûz Sahibe-i arzuhâl mu‘arrefetü’z-zât Şerife Fâtıma Şefika bt. es-Seyyid Mehmed Sâdık nâm hatuna şifâhen sâdır olan fermân-ı âlîlerine imtisâlen Çarşamba günü Arz Odası’nda huzûr-ı âsafânelerinde ma‘kūd meclis-i şer‘-i münîrde derûn-ı arzuhâlde isimleri mezkûr Bezzâzistânî Bâyezid oğlu es-Seyyid Mehmed Emin Efendi b. es-Seyyid Ahmed ve es-Seyyid Ahmed Efendi b. el-Hâc Osman nâm kimesneler muvâcehelerinde bakkālân pazarbaşısı Süleyman Ağa ve yiğitbaşısı Molla Abdi ve sâir mazbûtü’l-esâmî nizâm ustaları hazır oldukları hâlde İstanbul’da Mahmud Paşa Câmi‘-i şerîfi havlîsinin Çörekçi Kapısı içinde kâin mezbûrların bi’l-icâreteyn taht-ı tasarruflarında olan ma‘lûmü’l-hudûd bir bâb bakkāl dükkânında ben beher şehr onar guruş kirâ ile müste’cire ve dükkân-ı mezkûr derûnunda mevcûde beyne’l-hiref gedik ta‘bîr olunur mukayyed ve mu‘teber âlât-ı lâzıme-i ma‘lûme dahi yüz yirmi sehm i‘tibâriyle bâ-hüccet-i şer‘iyye yedimde müstakilleten emvâlim olup dükkân-ı mezkûr bu def‘a vukū‘ bulan harîkde bi-kazâillâhi te‘âlâ muhterik olmağla esnâf-ı merkūmenin yedlerinde olup bundan akdem sâdır olan fermân-ı âlî-şân mûcibince benim harîkden tahlîs eylediğim gedik âlât-ı lâzıme-i ma‘lûmesini kemâ-kân derûnuna nakl için dükkân-ı mezkûru merkūmânın binâ eylemelerine tenbîh olunmak matlûbumdur deyü istid‘â ve esnâf-ı merkūmenin ibrâz eyledikleri emr-i âlî-şânda bakkāl dükkânlarının bi’l-icâreteyn mutasarrıfları âhar dükkân yapmayıp yine bakkāl dükkânı binâ eylemesi mastûr olup lâkin beher hâl binâ eylemeleri musarrah olmamağla bu sûretde müdde‘iyye-i merkūmenin tesâddî eylediği cebren dükkân binâsı da‘vâsı meşrû‘a ve iltifâta şâyân olmadığı kendüye tefhîm ve da‘vâ-yı mezkûresiyle mezbûrân es-Seyyid Mehmed Emin Efendi ve es-Seyyid Ahmed Efendi’ye bî-vech mu‘ârazadan men‘ olunduğu İstanbul Mahkemesi’nde huzûr. Fî 10 Rebî‘ülevvel sene [1]242