İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 135 Hüküm no: 85 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmü Gülsüm Esma bt. Yusuf’un, babasının terekesine Ümmü Gülsüm bt. Ahmed’in el koyduğunu iddia ettiği 16025 guruş kıymetli eşyâ men‘i Ma‘rûz İstanbul’da Çırçır kurbünde Hacı Hasan mahallesinde sâkine sahibe-i arzuhâl mu‘arrefetü’z-zat Ümmü Gülsüm <> Esma bt. Yusuf nâm hatun lisânen sâdır olan fermân-ı âlîlerine imtisâlen Çarşamba günü Arz Odası’nda huzûr-ı lâmi‘u’n-nûr-ı âsafânelerinde ma‘kūd meclis-i şer‘-i münîrde derûn-ı arzuhâlde mezkûreti’l-ism kezâlik mu‘arrefetü’z-zat Ümmü Gülsüm bt. Ahmed nâm hatun muvâcehesinde babam Hotinli Yusuf Ağa b. Davud mahrûse-i Edirne’de Kādı Bedreddin mahallesinde misâfiren sâkin iken bin iki yüz yirmi sekiz senesi Zilka‘desinde fevt oldukda terekesi bana münhasır olduğundan mezbûre Ümmü Gülsüm Hatun’un zevci akrabâmdan koğuş kethudâsı Ali Efendi b. İsmail nâm kimesne tesviye-i emrime kıbel-i şer‘den vasî nasb olunarak babam mezbûrun mâlı olup bana mevrûs olan mecmû‘u on altı bin yirmi beş guruş kıymetli üç altın sâ‘at ve kırk miskāl incü ve bir elmaslı kuşak ve iki incülü kuşak ve dört elmaslı zümrüd yüzük ve dört çift elmaslı küpe ve bir sîmli pala ve beş çift sîmli tabanca ve iki sîmli kılıç ve on sîmli tüfenk ve bir sîmli Yatağan bıçağı ve bir sîmli En‘âm kîsesi ve on beş kehribâ çubuk takımı ve on beş tütün çubuğu ve yirmi iki çatma yasdık ve üç minder ve altı çuka mak‘ad ve iki orta keçesi ve on seccâde ve yirmi yorgan ve iki elma ve iki semmûr dört kürk ve dört kazgan ve beş leğen ma‘a-ibrik ve üç câmeşûy leğeni ve iki kebîr orta sinisi ve yedi tepsi ile dört Kelâm-ı Kadîm ve beş cild Muhammediye kitâbını vasîm merkūm ahz ü kabz ve ketm ü ihfâ edip ba‘dehû vasîm mezbûr dahi vefât ettikde zevcesi mezbûre Ümmü Gülsüm Hatun kezâlik ahz ve ihfâ etmekle eşyâ-i muharrere-i mezkûre mevcûde ise aynılarını müstehleke ise kıymetlerini mezbûre Ümmü Gülsüm Hatun’dan zamânen taleb ederim deyü da‘vâ ettikde ol dahi külliyen inkâr etmekle sünûh eden irâde-i isâbet-âde-i müşîrâneleri üzre istikşâf-ı hâl için evvel-emirde hâlâ Edirne vâlîsi vezîr-i mükerrem sa‘âdetlü atûfetlü paşa hazretleri bendelerine hitâben sâdır olan fermânnâme-i sâmîleriyle keyfiyet mahâllinden isti‘lâm ve Edirne Mahkemesi sicillinden kaydı suâl olundukda vâlî-î müşârün-ileyhin hâk-i pây-i hâcet-revâ-yı veliyyü’n-nu‘mânelerine takdîm eylediği cevâb-nâmesine mevzû‘an tesyîr olunup hâlâ mahrûse-i mezbûre kādısı fazîletlü efendi dâ‘îlerinin imzâ ve hatmini hâviye mahkeme-i mezbûre sicillinden muhrec müteveffâ-yı mezbûr Yusuf Ağa’nın defter-i kassâmında eşyâ-i mezkûreden bir nesne muharrer olmadığından başka müdde‘iyye-i mezbûre ber-vech-i muharrer müdde‘âsını bir vechile isbâta kādire olamayıp talebiyle mezbûre Ümmü Gülsüm Hatun bi’l-muvâcehe vech-i şer‘î üzre yemîn verilmeğin mûcibince müdde‘iyye-i mezbûre da‘vâ-yı mezkûresiyle merkūme Ümmü Gülsüm Hatun’a bilâ-beyyine mu‘ârazadan men‘ olunduğu İstanbul Mahkemesi’nden huzûr. Fî 9 Ra sene 1242