İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 138 Hüküm no: 87 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manol v. Yorgi’nin, Gedikpaşa’daki tütüncü gediğini Mustafa b. İsmail’e sattığı ve gediğin nakledildiği Tütüncü gediği nakli ve ismine kaydı Ma‘rûz Sâdır olan fermân-ı âlîlerine imtisâlen işbu arzuhâl ve derkenâra nazar olundukda İstanbul’da Gedikpaşa’da Başeski Kulluğu ittisâlinde vâki‘ ma‘den kaleminde Manol v. Yorgi zimmî ismine mukayyed gediğine tedâvül-i eydî ile şirâen mâlik olduğu bir bâb tütüncü dükkânı bundan akdem vukū‘ bulan harîkde muhterik oldukda arsasının mutasarrıfına işbu lüzûmu olduğuna binâen menziline ilâve edip ol vechile harîkden tahlîs olunan gedik âlâtının mahâll-i âhara nakli lâzım gelmekle emsâline kıyâsen Ayasofya-i Kebîr’de <> bakkāl ve manav dükkânları beynlerinde kâin Küçük Ayasofya Câmi‘-i Şerîfi Vakfı’ndan bâ-temessük-i mütevellî bi’l-icâreteyn mutasarrıf olduğum âhar gedikden ârî bir bâb dükkâna nakl ile mahâl ve ism-i evvelinin kaydları ref‘ ve terkīn ve mahâll-i sânîde mu‘teber ve müstakar olmak üzre nakl ve kendi ismine tashîhan kayd ile yedine bir kıt‘a sûret i‘tâ buyurulmasını sahib-i arzuhâl Tütüncü es-Seyyid Mustafa b. es-Seyyid İsmail kulları istirhâm eylediği mefhûm-ı arzuhâlden müstebân ve fi’l-vâki‘ gedik-i mezkûr mukayyed ve mu‘teber ve taht-ı nizâma dâhil kadîm tütüncü gediklerinden olduğu ve el-yevm sahib-i arzuhâl merkūm es-Seyyid Mustafa Usta kullarının şirâen mâlı olup bu makūle tütüncü dükkânlarının mülk sahibine eşedd-i lüzûmu olarak nakli iktizâ ettikde kurb ve civârında âhar kimesnenin mu‘teber gediği olmayan dükkâna kethudâ ve yiğitbaşı ve lonca ihtiyârları ma‘rifetini ve İstanbul kādısı i‘lâmıyla naklolunmak mer‘î ve mu‘teber nizâmı şurûtundan idüğü meâl-i derkenâr ve kethudâları Osman Ağa ve vekîli es-Seyyid Mustafa Ağa ve yazıcısı es-Seyyid Mehmed Nuri Efendi ve yiğitbaşısı Molla Ahmed ve sâir lonca ihtiyârlarının ihbârlarıyla zâhir ve nümâyân olmağın bu sûretde sahib-i arzuhâl-i merkūm kullarının istid‘âsı şurût-ı nizâma muvâfık olduğundan müsâ‘ade-i seniyyeleri erzânî buyurulup gedik-i mezkûr mahâll-i sânî-i merkūma nakl ile mahâl ve ism-i evvelinin kaydları ref‘ ve terkīn ve sahib-i arzuhâl-i mezbûrun ismine tashîhan kayd ile yedine kaleminden sûret i‘tâsı bâbında fermân-ı âlîleri sudûru iktizâ eylediği İstanbul Mahkemesi’nden huzûr. Fî 15 Ra sene 1242