İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 377 Hüküm no: 324 Orijinal metin no: [62a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe b. Mehmed’in, tütüncü gediğini İsmail Ağa b. Mustafa’ya sattığı Mübâya‘a-i tütüncü Ma‘rûz Tütüncü esnâfından İbrahim Beşe b. Mehmed meclis-i şer‘-i münîrde Suhte oğlu demekle ma‘rûf İsmail Ağa b. Mustafa mahzarında esnâf-ı merkūme kethudâsı Osman Ağa ve kethudâ vekîli es-Seyyid el-Hâc Mustafa Ağa ve yiğitbaşı Osman ve yazıcı es-Seyyid Mehmed Nuri ve sâir mazbûtü’l-esâmî kimesneler hazır oldukları hâlde takrîr-i kelâm edip mahmiye-i İstanbul’da Tahte’l-kal‘a [Tahtakale] nâm mahâlde çörekçi fırını karşısında bakkāl ve terzi dükkânları beynlerinde kâin ma‘den kaleminde kendi ismime mukayyed şurût-ı nizâmda dâhil bir bâb tütüncü dükkânı derûnunda mevcûde akd-i âti’z-zikrin sudûruna değin bâ-sûret yedimde müstakillen mâlım ve mülküm olan beyne’l-hiref gedik ta‘bîr olunur âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin merkūm İsmail Ağa’ya beş bin beş yüz guruş semen-i medfû‘ ve makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı râfi‘u’l-hısâm ile kabûlü hâvî ibrâ ve ıskāt eyledik fîmâ-ba‘d sâlifü’z-zikr âlât-ı lâzıme-i ma‘lûmede benim asla ve kat‘a alâka ve medhalim kalmayıp müşteri-i merkūm İsmail Ağa’nın mülk-i müşterâsı ve hakk-ı sırfı olmuşdur deyü ba‘de’l-ikrâr ve’t-tasdîk zikrolunan gedik âlât-ı lâzıme-i ma‘lûmesi kaleminde bâyi‘-i merkūm İbrahim Beşe’nin üzerinden ref‘ ve terkīn ve müşteri-i mezbûr İsmail Ağa kendi ismine kayd-birle yedine müceddeden [62b] bir kıt‘a sûret i‘tâsını istid‘â ve istid‘âsı muvâfık-ı şurût-ı nizâm olduğunu esnâf-ı hâzırûn-ı merkūmûn ihbâr ve inhâ eyledikleri İstanbul Mahkemesi’nden huzûr-ı âlîlerine i‘lâm olundu. Fî 13 Ş sene 1242