İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 516 Hüküm no: 467 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sırıkçılardan boşalan mahalle tuhafçı gedikleri nakledilirken Maniyel v. Sekyas’ın da tuhafçı gediğini naklettiği Nakl-i gedik-i tuhafçı Ma‘rûz Âsitâne-i aliyyede vâki‘ tuhafçı ve fincâncı esnâfından Manil v. Sekyas zimmî meclis-i şer‘-i münîrde esnâf-ı merkūme kethudâsı Ahmed Efendi ve vekîli es-Seyyid Mehmed Ağa ile yiğitbaşı Menteş Yahûdî ve bi’l-cümle esnâf-ı merkūme ustaları hazır oldukları hâlde İstanbul’da Sultân Bâyezid Kolluğu tahtında çeşme sırasında Asvador zimmî dükkânına muttasıl bir bâb tuhafçı dükkânı derûnunda mevcûde Başmuhâsebe’de mukayyed ve mu‘teber gedik âlâtı mâlım iken bu def‘a bi-inâyetillâhi te‘âlâ Kolluk-ı mezkûr hedm ve ilgā ve gediklerimiz Çarşı-yı Kebîr’de sırıkçı dükkânları olan mahalle nakli husûsuna irâde-i seniyye ta‘alluk ederek sâlifü’z-zikr sırıkçı dükkânlarının hevâî gediklerini mi‘mâr ağa ma‘rifetiyle ashâbından bi’l-iştirâ imhâ etmemizle ber-vech-i muharrer mâlik olduğum mu‘teber gedik âlâtı çarşı-yı mezkûrda Osmâniye kapısı tarafından ad ile on birinci kemer tahtında vâki‘ taht-ı icâremde vâki‘ mu‘teber gedikden ârî bir bâb kârgir mağazaya nakl ile kaleminden yedime sûret i‘tâsı niyâzımdır deyü istid‘â ve keyfiyet minvâl-i muharrer üzre olduğunu esnâf-ı hâzırûn-ı merkūmûn ihbâr ve inhâ etmeleriyle ber-vech-i istid‘â sûret i‘tâsı iktizâ eylediği İstanbul Mahkemesi’nden huzûr. Fî 14 min-Z sene 1242