İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 150 Hüküm no: 29 Orijinal metin no: [20b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul İhtisab mukataasının bir yıllığına mültezim Mehmed Hamdullah’a verildiği İhtisâb-ı İstanbul fermânı. Akzâ kuzâti’l-Müslimîn evlâ vülâti’l-muvahhidîn ma‘deni’l-fazli ve’l-yakīn râfi‘u a‘lâmi’ş-şerî‘ati ve’d-dîn vâris-i ulûmi’l-enbiyâi ve’l-mürselîn el-muhtassu bi-mezîd-i inâyeti’l-Meliki’l-Mu‘în Mevlânâ İstanbul kādısı zîdet fezâiluhû tevkī‘-i refî‘-i hümâyûn vâsıl olıcak ma‘lûm ola ki bâ-hatt-ı hümâyûn-ı şevket-makrûn Darbhâne-i âmirem tarafından zabt ve idâre olunan mukâta‘ât-ı mîrîden ihtisâb-ı İstanbul ve tevâbi‘i mukāta‘asının sülüs hisse-i Darbhâne-i âmiremde ve diğer sülüsân hissesi müşterekleri uhdesinde olup ötedenberü yed-i vâhidden zabt ve idâre olunu gelmekden nâşi mukāta‘a-i mezkûreyi işbu bin iki yüz otuz dokuz senesi Martı ibtidâsından sene-i merkūme Şubat’ı gāyetine değin bir sene-i kâmile yed-i vâhidden zabt u rabt ve idâre eylemek üzere deruhde ve iltizâmına tâlib ve râgıb olan hâlâ mültezimi Mehmed Hamdullah Bey zîde mecdühûya bâ-irâde-i seniyyem sâbıkı üzere ma‘a mâl ve kalemiye ve harc-ı aklâm ve fâiz-i mukāta‘a cem‘an otuz sekiz bin guruş bedel-i iltizâm ile deruhde ve ilzâm olunup mûmâ-ileyh dahi iltizâm ve kabûl-birle bedel-i iltizâmı olan meblağ-ı mezbûru vakt ü zamânıyla edâ ve teslîm eylemek üzere Darbhâne-i âmirem hazînesine memhûr deyn temessükü vermeğin ber-minvâl-i muharrer mukāta‘a-i mezkûreyi sene-i merkūmeye mahsûben yed-i vâhidden zabt ü rabt ve idâre ve vâki‘ olan mahsûlât ve rüsûmâtı ve âidâtın kānûn-ı kadîm ve olageldiği üzere cem‘ ü tahsîl ve ahz u kabz eyleyip taraf-ı âhardan müdâhale ve ta‘arruz olunmamak üzere yed-i vâhidden zabtiçin emr-i şerîfim i‘tâsını hâlâ Darbhâne-i âmirem nâzırı iftihârü’l-emâcid ve’l-kebâir [ve’l-ekârim] Mîr Hüseyin Hüsnü dâme ulüvvühu memhûr temessüküyle inhâ etmeğin imdi mûcebince amel olunmak fermânım olmuşdur. Buyurdum ki hükm-i şerîfim vardıkda bu bâbda sâdır olan emrim üzere amel edip dahi senki mevlânâ-yı mûmâ-ileyhsin nâzır-ı mûmâ-ileyhin verdiği temessük mûcebince ber-minvâl-i muharrer ihtisâb-ı İstanbul ve tevâbi‘i mukāta‘asını sene-i merkūmeye mahsûben mültezim-i mûmâ-ileyh tarafından yed-i vâhidden zabt ü rabt ve idâre ve vâki‘ olan mahsûlât ve rüsûmât ve âidâtı kānûn-ı kadîm ve olaggeldiği üzere cem‘ ve tahsîl ve ahz u kabz olunup hilâf-ı rızâ ve mugāyir-i evâmir-i âlişânım taraf-ı âhardan müdâhale ve ta‘arruz ettirilmemesi husûsuna mübâderet eyleyesin. Şöyle bilesin alâmet-i şerîfe i‘timâd kılasın. Fî 16 Ca sene [12]39.