İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 301 Hüküm no: 294 Orijinal metin no: [54a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtımatüzzehra Hanım’ın talebiyle küçük oğluna boşandığı kocasından nafaka takdiri Nafaka-i sagīr Mahmiye-i İstanbul’da Kantarcılar sûku kurbünde Timurtaş mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe işbu bâ‘isetü’l-vesîka Fâtımatüzzehrâ bt. Mehmed nâm hatun meclis-i şer‘de zevc-i sâbıkı Kuruyemişçiler kethüdâsı es-Seyyid Ahmed Ağa b. Mehmed mahzarında takrîr-i kelâm ve ta‘bîr ani’l-merâm edip merkūm es-Seyyid Ahmed Ağa ile bundan akdem zevciyyet beynimizde kāime iken merkūmun firâşından hâsıl ve benden mütevellid ve bi-hakkı’l-hıdâne hâlâ hacr u terbiyemde olan sulbî sagīr oğlum es-Seyyid Mehmed’in aslâ mâlı olmayıp nafaka ve kisveye eşedd-i ihtiyâc ile muhtâc olmağla sagīr-i merkūmun nafaka ve kisve-bahâsı’çün babası merkūm üzerine kıbel-i şer‘den ma‘rûf meblağ farz u takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i hâsim vâlâ cenâb veffakallâhu te‘âlâ bi’s-sıdk ve’s-savâb efendi hazretleri dahi sagīr-i merkūmun nafaka ve kisve-bahâsı’çün babası mezbûr es-Seyyid Ahmed üzerine beher şehr ellişer guruş <> farz ve takdîr ve meblağ-ı mefrûz-ı mezkûr beher şehr ellişer guruşu sagīr-i merkūmun nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası merkūm üzerine rücû‘a vâlidesi ve hâdinesi mezbûre Fâtımatüzzehrâ Hatun’a izin vermeğin mâ-vaka‘a [bi’t-taleb ketb olundu] Fî 5 Cumâdilâhire sene [1]247 Şuhûdü’l-hâl: Muhzır Hüseyin b. Yusuf, Hafız İsmail Ağa b. Mustafa, Sarrâc Hüseyin Ağa b. Abdullah.