İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 402 Hüküm no: 392 Orijinal metin no: [73a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikoli ile kardeşleri ve diğer şahısların bakkal dükkânı gediği hisselerini satmaya vekilleri olan Bakkal Dimitri ve Kiryako ile zimmet ibrası yaptıkları Bakkāl Hacı Memi dükkânından birbiriyle ibrâ hücceti Vilâyet-i Rumeli’de Yenişehir-i Fener kazâsına muzâfe Ağrafe nâhiyesi re‘âyâsında olup kendi nefsinden asıl ve li-ebeveyn er ve kız karındaşları Kostandi ve Yani zimmîler ve Maryora ve Eleni evlâd-ı Dimitri Nasrâniyeler ile Vangeli bt. Tanaş nâm Nasrâniye taraflarından husûs-ı âtîde vekîlleri eşhâs-ı mersûmânı bilir Papasoğlu Kostandi v. Yorgaki ve Dimitri v. diğer Yorgaki nâm zimmîler şehâdetleriyle sâbit olan Nikoli nâm zimmî ve kezâlik kendi nefsinden asıl ve li-ebeveyn kız karındaşları Lumice ve Marya ve Katrine benât-ı Yorgaki nâm Nasrâniyeler ile Yani zimmî ve diğer Eleni nâm Nasrâniye veledey Kostandi taraflarından ber-vech-i âtî vekîlleri olduğu yine şâhidân-ı mersûmân şehâdetleriyle sâbit olan Dimitri ve kezâlik kendi nefsinden asıl ve li-ebeveyn kız karındaşları Seryana ve Marika ve Kadinko ve âhar Eleni evlâd-ı Kiriç nâm Nasrâniyeler taraflarından husûs-ı câîde vekîlleri olduğu yine şâhidân-ı mesfûrân şehâdetleriyle sâbit olan başka Nikoli nâm zimmîlerden her biri meclis-i şer‘-i hatîrde bakkāl tâifesinden işbu hâmileyü’s-sifr Dimitri v. Varsemi ve şerîki Kiryako v. Kostandi nâm zimmîler muvâcehelerinde bi’l-asâle ve bi’l-vekâle ikrâr-ı tâm ve takrîr-i kelâm edip İslambol hısnı ebvâbından Kumkapı dâhilinde köşebaşında kâin Hacı Memi dükkânı denmekle şehîr bir bâb bakkāl dükkânının yüz yirmi sehmden yirmi iki buçuk sehmi mukaddemâ bizim ve müvekkillerimiz mersûmûnun yedimizde irsen mülkümüz olduğu hâlde dükkân-ı mezkûr ile [73b] nezdinde kâin sâir dekâkîn-i ma‘lûmeden hisselerimizin ücretlerini ahz u kabza ve bize teslîme mersûmân Dimitri ve Kiryako zimmîler tarafımızdan vekîllerimiz olup ol vechile husûs-ı mezkûra dâir mersûmân ile beynimizde ahz ü i‘tâ cereyân etmekle biz bu def‘a zimmîyân-ı mesfûrân ile müddet-i ma‘lûmede ber-minvâl-i muharrer beynimizde cârî ahz ü i‘tâmızın hesâbını yegān yegān sahîhan rü’yet eylediğimizde bizim mersûmân Dimitri ve Kiryako zimmîler zimmetlerinde altı yüz elli guruş alacağımız zuhûr eylediğinden sonra mesfûrân Dimitri ve Kiryako zimmîler meblağ-ı mezkûr altı yüz elli guruşu işbu meclis-i şer‘de bize tamâmen def‘ ü teslîm ve biz dahi yedlerinden bi’l-asâle ve bi’l-vekâle ahz u kabz edip bi’l-cümle husûs-ı mezkûra ve işbu târîh-i vesîkaya gelince beynimizde cereyân eden ahz ü i‘tâ ve mu‘âmelât-ı şettâ ve cemî‘ hukūk-ı şer‘iyyeye müte‘allika âmme-i de‘âvî ve kâffe-i mutâlebâtdan mersûmân Dimitri ve Kiryako zimmîlerin zimmetlerini bi’l-asâle ve bi’l-vekâle ibrâ-i âmm-ı sahîh-i şer‘î ile ibrâ ve iskāt eylediğimizde onlar dahi ibrâ-i mezkûrumuzu kabûl eylediler dediklerinde mukırrûn-ı mersûmûnu sâdır olan cemî‘ kelimât-ı meşrûhalarında mesfûrân Dimitri ve Kiryako zimmîler vicâhen tahkīk ve şifâhen tasdîk etmeleriyle mâ-vaka‘a bi’t-taleb ketb olundu. Fî 5 Şevvâl sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Kiryako, Ustabaşı Vasil, Ustabaşı İsak, Kabzımâl Sava.