İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 411 Hüküm no: 404 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maso Nasraniye ile çocuklarının sahibi oldukları kaymakçı dükkânı gediğini Kaymakçı Yuvan’a sattıkları Kumkapı’da kaymakçı Vilâyet-i Rumeli’de Manastır sancağında Göllükesri kazâsına tâbi‘ Poladse karyesi mütemekkinlerinden Maso bt. Yuvan nâm Nasrâniye ile sadrî kebîr oğulları Dino ve İliko nâm zimmîler ve sadriye kebîre kızları Batkano ve Ustonyo ve Yano ve Tafo nâm Nasrâniyelerden mersûme Batkano Nasrâniyenin zevci ve taraflarından husûs-ı âti’l-beyânda vekîlleri olduğu eşhâs-ı mersûmâtı bilir Kaymakçı Dimitri v. Kiri ve Kaymakçı Tanaş v. Mitro nâm zimmîler şehâdetleriyle sâbit olan Nikola v. Hıristiyan nâm zimmî meclis-i şer‘-i hatîrde kaymakçı tâifesinden işbu hâmilü’r-rakīm Yuvan v. Yorgi nâm zimmî [muvâcehesinde ikrâr-ı tâm ve takrîr-i kelâm edip] İstanbul hısnı ebvâbından Kumkapı hâricinde vâki‘ bir tarafdan Helvacı Hüseyin Ağa dükkânı ve bir tarafdan Abacı Aci Toma zimmî dükkânı ve bir tarafdan arsa-i hâliye ve taraf-ı râbi‘i tarîk-i âm ile mahdûd şehriye dokuz guruş kirâ-i kadîmeli bir bâb kaymakçı kârhânesi derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme müvekkillerim mersûmûnun ber-minvâl-i muharrer mâlikler oldukları gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Yuvan zimmîye dört bin beş yüz guruşa bi’l-vekâle bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr dört bin beş yüz guruşu müşteri-i mersûm Yuvan zimmî bana tamâmen def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âm [sahîh-i şer‘î] ile ibrâ ve iskāt eyledik fîmâ-ba‘d âlât-ı gedik-i mezkûrda müvekkillerim mersûmûnun aslâ ve kat‘â alâka ve medhalleri kalmayıp müşteri-i mersûm Yuvan zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 27 Şevvâl sene 1247 Şuhûdü’l-hâl: Kethüdâ İsmail Ağa, Yiğitbaşı el-Hâc Ömer Ağa ve gayruhum. Alacahamam’da Usta İlya, Kıztaşlı Usta Mihal, Kesmekayalı Usta Hıristo, Kasımpaşalı Usta Yani.