İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 412 Hüküm no: 406 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri ile kız kardeşi Mora’ya bakkal dükkânı gediği için hüccet verilmesi Mercan’da ihbâr-ı bakkāl Vilâyet-i Rumeli’de Yenişehir-i Fener kazâsına tâbi‘ Kireşova karyesinde mütemekkinler işbu hâmilü’r-rakīm Dimitri zimmî ve li-ebeveyn kız karındaşı Mora veledey Yani nâm Nasrâniye taraflarından husûs-ı âtîde vekîl-i sâbitü’l-vekâleleri Bakkāl Yorgi v. diğer Yani nâm zimmî meclis-i şer‘-i hatîrde bi’l-vekâle takrîr-i kelâm ve bast ani’l-merâm edip İstanbul’da Mercan Ağa Câmi‘-i şerîfi civârında kebabcı dükkânı karşısında Yaldızlıhan ittisâlinde kâin Mehmed Çelebi dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla on sehmi Aci Yani zimmî veresesi Marya ve Praşkova ve Zoviçe Nasrâniyeler ile Kosti zimmînin ve on sehmi hâlik Yorgi zimmî veresesinin ve altı sehmi diğer Yorgi zimmînin ve yirmi sehmi Kosta zimmînin ve on dört buçuk sehmi İstamo bt. Niko ve on üçer buçuk sehmden kırk buçuk sehmi Uğuriçe ve diğer Zoviçe ve âhar Praşkova Nasrâniyelerin ve dokuz sehmi Katrine Nasrâniyenin ve on sehmi müvekkillerim mersûmânın yedlerinde şâyi‘an mülkleri olup lâkin âlât-ı gedik-i mezkûrun on sehm hisse-i mezkûresi müvekkillerim mersûmânın mülkleri olduğunu nâtıka yedlerinde hüccetleri olmamağla husûs-ı mezkûre esnâf-ı merkūmeden vukūf ve ıttılâ‘ları olan kimesnelerden istihbâr olunup kıbel-i şer‘den yedlerine bir kıt‘a hüccet i‘tâ olunmak bi’l-vekâle murâdımdır dedikde fi’l-hakīka gedik-i mezkûrun on sehm hisse-i mezkûresi müvekkilân-ı mersûmânın yedlerinde mülk-i mevrûsları olduğunu esnâf-ı merkūmeden zeyl-i vesîkada muharrerü’l-esâmî kimesneler alâ-tarîkı’ş-şehâde ihbâr etmeleriyle hıfzan li’l-makāl işbu vesîka-i enîka bi’t-taleb ketb ü imlâ olundu. Fi’l-yevmi’t-tâsi‘ aşer Muharrem sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı İsak, Ustabaşı İstefan, Ustabaşı Zaharya, Yazıcı Yani.