İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 538 Hüküm no: 473 Orijinal metin no: [185-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf kasap dükkânına ait hisse satışı Mirâhor mahallesinde [Ma‘rûz] Kezâlik ( ) bi’l-vekâle takrîr-i kelâm edip vakf-ı müşârün-ileyh müstegallâtından olup Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla yedinci selhhâneye merbût kasab dükkânlarından medîne-i Üsküdar’da Mirâhor <> mahallesinde vâki‘ ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik ta‘bîr [olunur] vakıf âlât-ı lâzıme-i ma‘lûmenin nısf hissesine bâ-temessük-i mütevellî bi’l-icâreteyn mutasarrıf olan mezbûr Kasab Ali bundan akdem fevt olup nısf hisse-i mezkûre sulbî kebîr oğlu müvekkil-i mezbûr Mehmed Ağa ve kebîre kızı Hatice Hatun’a hasbe’l-âde seviyyen intikāl ettikden sonra bu esnâda mezbûre Hatice Hatun dahi bilâ-veled fevt olmağla ber-minvâl-i muharrer intikālen mutasarrıfe olduğu rub‘ hisse-i gedik-i mezkûr mahlûl ve cânib-i vakf-ı şerîfe âid ve râci‘ oldukdan sonra hisse-i mezkûre lede’l-müzâyede ve inkıtâ‘u’r-rağbe iki bin guruşda müvekkil-i mezbûr Mehmed Ağa üzerinde karâr ve ziyâde ile tâlib-i âharı zuhûr etmeyip ve meblağ-ı mezkûr hisse-i merkūmenin el-yevm mu‘accele-i misli idiği ihbâr olundukdan sonra hisse-i mezkûreyi meblağ-ı merkūm iki bin guruş icâre-i mu‘accele ve icâre-i müeccele-i kadîmesiyle bi’l-vekâle müvekkil-i mezbûr Mehmed Ağa’ya îcâr ve vech-i lâyıkı üzere teslîm eylediğimde ol dahi ber-minvâl-i muharrer istîcâr ve tesellüm ve kabz ve kabûl etmekle mu‘accele-i mezkûre iki bin guruşu vekîl-i mezbûr es-Seyyid Ebûbekir Ağa yedinde olan ilmühaber tezkiresi mûcebince Hazîne-i Evkāf-ı Hümâyûn tarafına def‘ ve teslîm ve emriyle umûr-ı vakf-ı şerîfe sarfla istihlâk olunmağla fîmâ-ba‘d rub‘ hisse-i âlât-ı gedik-i mezkûr dahi mezbûr Mehmed Ağa’nın dâhil-i havza-i tasarrufu olmuşdur deyü ba‘de’l-ikrâr ve’t-tasdîk bu sûretde gedik-i mezkûrun nısf [rub‘] hissesi vech-i meşrûh üzere babası müteveffâ-yı mezbûr Kasab Ali’nin intikālinden ve kız karındaşı müteveffât-ı mezbûre Hatice Hatun’un mahlûlünden defter-i vakf-ı şerîfde mezbûr Mehmed Ağa uhdesine kayd ü zabt ve tasarrufi’çün müceddeden bir kıt‘a temessük tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 28 N sene 1258