İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 553 Hüküm no: 485 Orijinal metin no: [190-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miras yoluyla intikal eden vakıf kasap dükkânları gediklerinin devir ve satış işlemleri [Ma‘rûz] Kezâlik ri‘âyet şartıyla beşinci selhhâneye merbût kasab dükkânlarından mahrûse-i Galata hâricinde Beyoğlu nâm mahâlde Kamer Hatun mahallesinde yemenici dükkânı ittisâlinde vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin <> nısf hissesi beş sehm ve zikr olunan beş sehmin dört sehmi dahi kırk bir sehm i‘tibârıyla sâlifü’l-beyân kırk bir sehmin yedi sehm hissesine bâ-temessük-i mütevellî bi’l-icâreteyn mutasarrıf olan Nako v. Kiro zimmî bundan akdem hâlik olup ber-vech-i meşrûh mutasarrıf olduğu yedi sehm hissesi sulbî kebîr oğulları Kosti ve Petro zimmîler ile kebîre kızları olup hâlâ vilâyet-i Rumeli’de medîne-i Ergirikasrı’ya muzâfe Lench nâhiyesine tâbi‘ Kesturat karyesinde mütemekkineler Zobiçe ve Kaço Nasrâniyelere hasbe’l-âde irbâ‘an intikāl eylediğini hâlâ kasablar kethudâsı es-Seyyid Mehmed Bey ile mazbûtü’l-esâmî kasab ustaları ihbâr eylediklerinden sonra gāibetân-ı mersûmetân Zobiçe ve Kaço Nasrâniyeler taraflarından husûs-ı âti’l-beyânda bâ-hüccet vekîlleri olduğu şahıslarını bilirler karye-i mezkûre re‘âyâsından Sava v. Dimitri ve Aleko v. Çano nâm zimmîler şehâdetleriyle <> mukaddemâ muvâcehe-i hasm-ı şer‘îde ber-nehc-i şer‘î sâbit olan Hıristaki v. Dino zimmî mersûm Kosti zimmî dahi hâzır olduğu hâlde meclis-i şer‘-i hatîrde kasab tâifesinden bâ‘isü’l-i‘lâm Dino v. Yorgi zimmî tarafından zikri âtî husûsda tasdîka vekîl-i şer‘îsi Hafız İsmail Efendi b. Mustafa muvâcehesinde bi’l-vekâle takrîr-i kelâm edip yedi sehm hisse-i mezkûreden müvekkilelerim gāibetân-ı mersûmetân Zobiçe ve Kaço Nasrâniyelere babaları hâlik-i mersûmdan âdiyen intikāl eden nısf hisseyi ben bi’l-vekâle ve hâzır-ı mersûm Kosti zimmî dahi kendine babası hâlik-i mersûmdan intikāl eden rub‘ hisseyi bi’l-asâle bedel-i ma‘lûm ve makbûz mukābelelerinde müvekkil-i mersûm Dino zimmîye bâ-re’y-i mütevellî ferâğ-ı kat‘î-i mu‘teber ile ferâğ ve tefvîz eylediğimizde ol dahi ber-vech-i muharrer tefevvüz ve kabûl ve hisse-i tevzî‘ini kethudâ ve kasab ustaları ma‘rifetleriyle almağa ta‘ahhüd edip fî-mâ ba‘d husûs-ı merkūmede müvekkilelerim gāibetân-ı mersûmetân ile karındaşları asıl hâzır-ı mersûm Kosti zimmînin aslâ ve kat‘a alâka ve medhalleri kalmayıp müvekkil-i mesfûr Dino zimmînin dâhil-i havza-i tasarrufu olmuşdur deyü ba‘de’l-ikrâr ve’t-tesâdık âlât-ı gedik-i mezkûrdan yedi sehm hisse-i merkūme hâlik-i mersûm Nako zimmîden evlâdı mersûmûn Kosti ve Petro zimmîler ve Zobiçe ve Kaço Nasrâniyelere ba‘de’l-intikāl vech-i meşrûh üzere ancak nısf ve rub‘ [191] hisse-i merkūmeler vekîl ve asıl-ı mersûmân Hıristaki ve Kosti zimmîlerin ferâğlarından defter-i vakf-ı şerîfde müvekkil-i mesfûr Dino zimmî uhdesine kayd ve der-dest olan temessük-i mezkûr hâmişine zabt ü tasarrufi’çün tahrîr ve temhîr ve mersûm Petro zimmîye babası hâlik-i mersûmdan intikāl eden diğer rub‘ hisse dahi temessük-i mezkûrdan ifrâz birle şerh verilip zabt ü tasarrufi’çün taraf-ı vakfdan müceddeden bir kıt‘a temessük tahrîr ve temhîr ve yedlerine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî-selhi L sene 1258