İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 56 Hüküm no: 3 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali Ağa’nın evinin açık artırma sonucu Halil Bey’e satıldığı Mahmiye-i İstanbul mahallâtından Kiçi Hatun mahallesi sâkinlerinden olup yeniçeriler kethudâsı iken Şark seferinde vefât eden Ali Ağa b. Abdullah’ın zâhirde zevce-i metrûkesi Saliha Hatun bt. Abdullah’dan gayrı vâris-i ma‘rûfu olmadığı ecilden muhallefâtının selâse-i erba‘ı beytü’l-mâlü’r-râcilîne âid olmağın mahmiye-i mezbûrede tâife-i râcilîne bi’l-fi‘il beytü’l-mâl emîni olup müteveffâ-yı mezkûrun muhallefâtının selâse-i erba‘ına vâzı‘ü’l-yed olan fahrü’l-a‘yân Mehmed Ağa b. İlyas mezbûre Saliha Hatun tarafından menzil-i âti’l-beyândan hisse-i şâyi‘asını âhara bey‘e vekîl olup mezbûre Saliha’yı ma‘rifet-i şer‘iye ile ârifân olan Ahmed b. Yakub ve Mahmud b. Hayreddin şehâdetleri ile vekâleti şer‘an sâbite olan Abdi Ağa b. Hürrem meclis-i şer‘-i hatîr-i lâzımü’t-tevkīrde işbu sâhibü’l-kitâb Halil Bey b. Veli nâm bevvâb-ı sultânî mahzarından her biri ikrâr ve takrîr-i kelâm edip müteveffâ-yı mezbûrun mahalle-i mezkûrede vâki‘ bir tarafı Akbıyık Mahmud Ağa Vakfı’na ve iki tarafı Saime Hatun mülküne ve taraf-ı âharı tarîk-i âmma müntehî olup muhavvata-i dâhiliyesi iki fevkānî odayı ve bir matbah ve bir zîr-i zemîn ve bir sofa ve bir fırını ve kenîfi müştemil olan menzil rızâmız ile Sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyh Halil Bey üzerinde altmış dört bin akçede karâr edip ziyâde ile âhar tâlibi olmadığı ecilden menzil-i mezbûrun rub‘unu vekâleten ve selâse-i erba‘ını emâneten merkūm Halil Bey’e meblağ-ı mezbûr altmış dört bin akçeye cemî‘ tevâbi‘i ve levâhıkı ile bey‘ edip kabz-ı semen-i ma‘dûd ve teslîm-i mebî‘-i mahdûd eyledik ba‘de’l-yevm menzil-i merkūm müşârün-ileyh Halil Bey’in mülk-i müşterâsıdır keyfe mâ yeşâ ve yahtâr mutasarrıf olsun dediklerinde mukırrân-ı merkūmânı ikrâr-ı meşrûhlarında el-mukarru lehü’l-mezbûr bi’l-muvâcehe tasdîk etmeğin mâ-hüve’l-vâki‘ bi’t-taleb ketb olundu. Tahrîren fî-evâsıtı Rebî‘ü’l-âhir li-sene seb‘a ve ışrîn ve elf. Şühûdü’l-hâl: Ebûbekir b. Fazlullah el-bezzâz, İbrahim Çelebi b. Mustafa, Ömer Çelebi b. Feyzullah, Hacı Yunus b. Mehmed, Hacı Salih b. Mehmed, Hacı Ayvaz b. İyaz, Hacı Abdurrahman b. Maden eş-şehîr bi-Timur, Mustafa muharrirü’l-hurûf el-muhzır?, Abdulkadir b. İlyas Beşe çukadâr, İslâm b. Baba Habib, Mehmed b. Hamza, Mustafa b. Abdullah.