İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 58 Hüküm no: 5 Orijinal metin no: [2a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Himmet b. Pir Gaib’in vasiyetlerinin tenfizine vasi atadığı Udûl-i Müslimînden Ebûbekir b. Mehmed, Davud b. Halil ve Musa b. Mehmed nâm kimseler meclis-i şer‘-i şerîfe hâzırûn olup mahmiye-i İstanbul’da vâki‘ Yavuzer mahallesi sâkinlerinden iken bundan akdem vefât eden Himmet b. Pir Gaib’in zâhirde zevcesi Şâkire bt. Abdullah nâm hatundan gayrı vâris-i ma‘rûfu olmadığı ecilden muhallefâtının selâse-i erba‘ına vâzı‘ü’l-yed olan ve husûs-i âti’l-beyânı münkir bulunan mahmiye-i mezbûrede vâki‘ Beytü’l-mâl-i hâs emîni Mahmud Ağa b. Pervâne mahzarında hâmil-i hâze’l-kitâb Mehmed b. Mehmed’den sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûr maraz-ı mevte yakalanıp başını mevt yastığına koyduğunda sülüs-i malının techîz ve tekfînine, eyyâm-ı mu‘tâdede it‘âm-ı fukarâya ve kalanın vücûh-ı hayrâta sarf edilmesini vasiyet edip müsteşhed-i mezbûru da vesâyasının tenfîzine vasîyy-i muhtâr nasb etti ve vasiyetinde mukırrân ve musırran vefât eyledi. Mezkûr Mehmed de vesâyet-i merkūmeyi kabûl edip hizmet-i lâzımesini edâya müte‘ahhid oldu. Biz bu husûsa şâhidleriz şehâdet dahi ederiz dediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a olup mûcebiyle hükmolundu. Cerâ zâlike ve hurrire fî-evâsıtı Cumâdelûlâ li-sene seb‘a ve ışrîn ve elf. Şühûdü’l-hâl: Ali b. Bâli, Mustafa b. Mehmed, Hızır b. Üveys, Bâli b. Yusuf, Ramazan b. Yusuf, Ramazan b. Bâli, el-Hâc İsmail b. Mustafa