İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 120 Hüküm no: 78 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ramazan Çavuş’un Derviş Çavuş’a nikâhlandığı Vilâyet-i Anadolu’da Mud kazâsına tâbi‘ Absud nâm karye sâkinelerinden Âişe bt. Ramazan Çavuş nâm bikr-i bâliğanın li-ebeveyn karındaşı ve veliyy-i akrebi ve husûs-ı âtîye vekîl olup hasm-ı şer‘î mahzarında Osman Çavuş b. Ramazan ve Mehmed Bey b. Emlüddin ve Mustafa Bey b. Abdullah el-cündî şehâdetleriyle vekâleti sâbite olan Mehmed Bey b. Ramazan Çavuş meclis-i şer‘-i şerîfde fahrü’l-cüyûş Derviş Çavuş mahzarında takrîr-i merâm edip kız karındaşım ve müvekkilem mûmâ-ileyhâ Âişe’yi seksen bin akçe mehr-i mu‘accel ve elli bin akçe mehr-i müeccel üzerine mesfûr Derviş Çavuş’a tezvîc-i sahîh-i şer‘î ile tezvîc etdim mezbûr Derviş Çavuş dahi zikr olunan seksen bin akçe mehr-i mu‘accel ve elli bin akçe mehr-i müeccel üzerine müvekkilem mezbûre Âişe’yi tezevvüc etdi deyü ikrâr etdikde mezbûr Derviş Çavuş mesfûr Mehmed Bey’i kelimât-ı meşrûhasında vicâhen tasdîk ve şifâhen tahkīk edicek mâ-vaka‘a gıbbe’t-taleb ketb ve sebt olunup yed-i tâlibe vaz‘ olundu ki lede’l-hâce müzekkir-i mâ-cerâ ola. Tahrîren fi’l-yevmi’l-isneyni’s-sâlis min-şehri Saferi’l-muzaffer li-sene sitte ve elf. Şühûdü’l-hâl: Muhyiddin Efendi b. Hamza, Sunullah b. Ali el-müezzin min-câmi‘i Kalenderhâne, Hacı Mehmed mine’l-kayyum-ı Nakilbendhâne, Şemseddin Efendi b. ( ), Mehmed Efendi b. ( ) el-imâm fî-mescid-i Hüsrev Ağa, Hacı Efendi b. ( ) el-kādı bi-Karataş, Şeyh Ali b. Mehmed, Malkoç Ağa b. Abdullah ez-zevvâk-ı sultânî, Ahmed Çavuş b. Abdullah, Mahmud Subaşı b. Abdullah ve gayruhum.