İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 121 Hüküm no: 80 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nurullah Çavuş’un muhallefatından eşi Mâhrâna Hatun’un hissesine aldığı Mahmiye-i İstanbul’da Mesih Paşa-i Atik mahallesinde sâkin olup seferde vefât eden merhûm Nurullah Çavuş b. (…) vârisi zevcesi fahrü’l-muhadderât Mâhrâna Hatun bt. Abdurrahman’a ve zevce-i merkūmeden olup kendiden sonra vefât eden sagīre kızı Âişe’ye ve sagīre [sagīr] oğlu Sefer’e münhasıra olup mezbûre Mâhrâna Hatun bt. Abdurrahman tarafından husûs-ı âti’z-zikre bimâ hüve nehcü’s-sübût şer‘an vekâleti sâbite olan Yusuf Bey b. Abdülmennan nâm bevvâb-ı sultânî meclis-i şer‘-i şerîfde müteveffâ-yı mezbûrun karındaşı olup sagīr-i mezbûr Sefer’e kıbel-i şer‘den vasî olan fahrü’l-cüyûş Emrullah Çavuş b. Armağan mahzarında takrîr-i merâm edip müteveffâ-yı mezbûr Nurullah Çavuş’un defter-i kassâm-ı askerîde muharrer olduğu üzere muhallefâtından müvekkile-i mezbûreye irs-i şer‘î ile intikāl eden seksen üç bin yedi yüz yirmi üç akçe sümün hisse-i şer‘iyesin ve kızı mezbûre Âişe’den intikāl eden altmış iki bin iki yüz sülüs hisse-i şer‘iyesinden ve yüz bin akçe mehr-i müecceli cem‘an iki yüz kırk altı bin akçeyi müvekkilem mûmâ-ileyhâ Mâhrâna Hatun’a îsâl için vekâletim hasebiyle alıp kabz eyledim deyü tâyi‘an ikrâr etdikde mâ-hüve’l-vâki‘ gıbbe’t-tasdîk kayd olundu. Fî-evâili Saferi’l-muzaffer li-sene sitte ve elf mine’l-Hicre. Şühûdü’l-hâl: Hasan b. Abdullah el-bevvâb ve Mustafa Bey b. Abdullah el-bevvâb ve Müstedam b. Abdullah ve diğer Mustafa b. Abdullah.