İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 133 Hüküm no: 97 Orijinal metin no: [21b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Selahaddin Mısrî’nin Kamer Hatun’un vasiyeti üzere Hacca gitmek için para aldığı Mahrûse-i İstanbul’da Pirinççimescidi mahallesinde sâkin olan umdetü’l-müderrisîn eş-Şeyh Celaleddin b. eş-Şeyh Şemseddin el-Ensârî el-Mısrî meclis-i şer‘-i şerîfde mahrûse-i mezkûrede Tercümanyunus mahallesinde müteveffât olan Kamer Hatun bt. Halil’in vesâyâ-yı şer‘iyesini tenfîze vasîyy-i muhtâr olan Abdülbâki Efendi b. Hasan ve müteveffât-ı mezbûrenin zevci ve vârisi olan Mehmed Ağa b. Abdülmennan nâm zevvâk-ı sultânî mahzarında takrîr-i merâm edip müteveffât-ı mezbûre Kamer Hatun bt. Halil kendiden Hac olunmaği’çün sülüs mâlından îsâ’ etdiği dokuz bin akçeyi bi’t-tamam ve’l-kemâl vasîyy-i muhtâr Abdülbâki yedinden mezbûr Mehmed Ağa huzûrunda müteveffât-ı mezbûreden Haccetmek için kabz ve tesellüm eyledim deyü ikrâr-ı tav‘î etdikde mâ-vaka‘a gıbbe’t-tasdîk ve’t-taleb ketb olundu. Tahrîren fî-evâhiri Safer sene 1006. Şühûdü’l-hâl: Es-sâbikūn.