İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 134 Hüküm no: 99 Orijinal metin no: [22a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Kethuda’nın çocuklarına ve vasiyetlerinin tenfizine vasi atadığı Mevlana Kasım Efendi b. Bâli ve İsmail b. Mehmed nâm kimseler meclis-i şer‘a hâzırân olup mahmiye-i Kostantıniyye mahallâtından Revan mahallesinde bundan akdem fevt olan merhûm Mustafa Kethudâ b. Abdülmennan’ın Ahmed, Fatıma, Âişe, Hadice, Emine ve Safiye nâm evlâd-ı sıgārına kıbel-i şer‘den mansûb vasî olan Mustafa b. Yusuf mahzarında bâ‘is-i hâze’s-sicil iftihârü’l-emâcid ve’l-ekârim Mustafa Ağa b. Abdüsselamdan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûr maraz-ı mevte yakalanıp başını mevt yastığına koyduğunda cemî‘ sülüs-i malının vücûh-ı hayrât ve esnâf-ı meberrâta sarf edilmesini vasiyet edip müsteşhed-i mezbûru da evlâd-ı sıgārına ve vesâyasının tenfîzine vasîyy-i muhtâr nasb etti ve vasiyetinde mukırrân ve musırran vefât eyledi. Mezkûr Mustafa Ağa da vesâyet-i merkūmeyi kabûl edip hizmet-i lâzımesini edâya müte‘ahhid oldu. Biz bu husûsa şâhidleriz şehâdet dahi ederiz dediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a olup mûcebiyle hükmolundu. Cerâ zâlike ve hurrire fî-evâhiri Ramazan el-mübârek li-sene hamse ve elf. Şühûdü’l-hâl: Mevlana Kasım Efendi b. Ali el-mülâzım, Yusuf Çavuş b. Ahmed, Memi Ağa b. Abdülmennan el-müteferrika, Mehmed Çelebi b. Rıdvan el-müteferrika, Mehmed b. Rıdvan