İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 145 Hüküm no: 113 Orijinal metin no: [25a-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Abdullah’ın İsmihan adlı çocuğa vasi olduğu Mahmiye-i Kostantıniyye mahallâtından Elvanzâde mahallesi müezzini mevlana Mahmud b. Mehmed ve Mehmed b. Abdullah nâm kimseler meclis-i şer‘-i şerîfe hâzırân olup mahmiye-i mezbûrede bundan akdem vefât eden Mehmed Çavuş b. Abdülmennan’ın İsmihan nâm sagīre kızına kıbel-i şer‘den mansûb vasî olan Mustafa Çelebi b. Abdurrauf mahzarında, müteveffâ-yı mezbûrun zevcesi ve vârisi olan hâmile-i hâze’l-kitâb Fatıma bt. Abdullah nâm hatundan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûr Mehmed Çavuş hâl-i hayatında İsmihan nâm sagīre kızına müteveffâ-yı mezbûrdan irs-i şer‘le intikāl eden emvâlin hıfzı ve ahvâlinin zabtı için müdde‘iye-i merkūmeyi vasî nasbetti. Mezbûre Fatıma hatun da vesâyet-i merkūmeyi kabûl edip hizmet-i lâzımesini edâya müte‘ahhide oldu. Şehâdeten sahîhaten şer‘iyeten makrûneten bi’l-kabûl ba‘de ca‘li şerâitihî mer‘iyeten, hâkim şehâdetleri mûcebince hükmetti. Cerâ zâlike ve hurrire fî 24 Ramazan li-sene hamse ve elf. Şühûdü’l-hâl: Mehmed b. Abdullah el-bevvâb, Ömer b. Abdullah el-cündî, Mahmud b. Abdullah el-cündî, Hasan b. Mahmud el-imâm, Mehmed b. Mehmed, Mustafa b. Mahmud ve gayruhum