İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 146 Hüküm no: 115 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nuh Bey’in vakfettiği para vakfının eski mütevellisi Sarraç Hasan Halife’nin vakfa ait olan paranın muhallefatından tahsil edilmesini vasiyet ettiği İstanbul’da Mimâr Kemal mahallesinde Nuh Bey vakfettiği otuz bin akçeye berât-ı âlî-şân ile bi’l-fi‘il mütevellî olan İbrahim b. Ali meclis-i şer‘-i şerîfde vakf-ı merkūma mütevellî iken mahalle-i mezbûrede vefât eden Sarrâc Hasan Halîfe b. Abdullah’ın bint-i sulbiyesi merkūme Fatıma’nın sulbî sagīr oğlu ve müteveffâ-yı mezbûrun vârisi ( ) kıbel-i şer‘den mansûb vasîsi olan geri babası Mevlana İbrahim b. Hüseyin ve müteveffât-yı merkūmun zevcesi ve vârisesi olan Şemsi bt. Abdullah’ın husûs-ı âtîye vekîl-i şer‘îsi olan Sefer Bey b. Abdullah mahzarında takrîr-i merâm edip mütevellîsi olduğum meblağ-ı mezbûr otuz bin akçenin on üç bin akçesi mütevellî-i sâbık merkūm yedi ile Meşkçi Hüseyin zimmetinde olan ve bin akçesi Nasuh Halîfe zimmetinde olup ve iki bin akçesi benim bildiğim yerlerde olup mezbûr Hasan Halîfe hâl-i marazında bâkī kalan on dört bin akçe[yi] Sarıyer’de bana intimâ ile ma‘rûf olan mülk bahçemden yetmez ise muhallefâtımdan edâ olunup otuz bin akçe tekmîl oluna deyü îsâ’ etdi meblağ-ı bâkī-i merkūmu muhallefât-ı mûmâ[-ileyh]den taleb ederiz suâl olunsun dedikde gıbbe’s-suâl ve’l-inkâr ve’l-istişhâd ahrâr-ı Müslimînden Yusuf Ağa b. Abdülmennan ve Nasuh Halîfe b. Abdi meclis-i şer‘-i şerîfde merkūmân vasî ve vekîl mahzarında fi’l-hakīka vakf-ı merkūma sâbıkā mütevellî [olan] mezbûr Sarrâc Hasan Halîfe hâl-i marazında meblağ-ı merkūm otuz bin akçenin on üç bin akçesi Meşkçi Hüseyin’de ve bin akçesi Nasuh Halîfe’de ve iki bin akçesi müdde‘î-i merkūm[un] gösterdiği yerlerde olup bâkī kalan on dört bin akçe Sarıyer’de mülk bahçemden yetmezse sâir muhallefâtımdan edâ olunup otuz bin akçe tekmîl oluna deyü îsâ’ etdi bu husûsa biz şâhidleriz şehâdet-i şer‘iye dahi ederiz dediklerinde mâ-vaka‘a gıbbe’t-taleb ketb olundu. [Tarih yazılmamıştır.] Şühûdü’l-hâl: Ahmed Çavuş b. Mehmed, Taceddin b. Eymirhan, Ahmed Çelebi b. Mehmed, Ahmed Çavuş b. Kılıç, Mehmed Terzi ve gayruhum.