İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 157 Hüküm no: 135 Orijinal metin no: [28b-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Mehmed Bey’in karısına mehir borcu olduğu Ali b. Ramazan ve Mehmed b. Hızır nâm kimseler meclis-i şer‘-i şerîfe hâzırân olup mahmiye-i Kostantıniyye mahallâtından Dülgeroğlu mahallesinde bundan akdem vefât eden Mehmed Bey b. Hasan’ın Âişe ve Meryem nâm sagīreteynine kıbel-i şer‘-i mergūbdan vasîyy-i mansûb olan ve husûs-ı âti’z-zikri münkir bulunan el-Hâc Hüseyin b. Abdullah nâm hasm-ı câhid mahzarında, merhûm-ı mezbûrun zevcesi ve vârisi olan Bâdısaba bt. Abdullah’dan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müdde‘iye-i mezbûrenin esnâ-yı nikâhında ma‘kūdun aleyh olan mehr-i müecceli cihetinden müteveffâ-yı mezbûr zevci üzerinde râyicü’l-vakt dört bin akçe hakkı vardır. Hakkını kısmen veyâ tamamen ahz ü kabz etmediğine, zevcinin hâl-i hayatında hakkını başkasına havâle etmediğine, zimmetini bi-vechin mine’l-vücûhi şer‘iye ibrâ etmediğine dâir müdde‘iye-i merkūme tahlîf edilmeğin gıbbe ri‘âyeti şerâiti’l-kabûl şehâdetleri mûcebince hükmedildi. Cerâ zâlike ve hurrire fî-evâili şehri Şevvâl li-sene hamse ve elf. Şühûdü’l-hâl: Mehmed b. Ramazan, Mustafa b. Mahmud, Mehmed b. Hamza, Ferhad b. Abdullah, Yusuf b. Abdullah