İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 158 Hüküm no: 137 Orijinal metin no: [29a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin ölen Mehmed Çelebi’den alacağı olduğu Ahmed Çelebi b. Aydın ve Ali Bey b. Mehmed nâm kimseler meclis-i şer‘-i şerîfe hâzırân olup mahmiye-i Kostantıniyye mahallâtından Kızıl [Kırık] Musluk mahallesinde bundan akdem fevt olan Mehmed Çelebi b. Ali’nin Ümmühani nâm sagīr kızının tesviye-i umûruna kıbel-i şer‘-i mergūbdan mansûb vasî olan ve husûs-ı âti’z-zikri münkir bulunan zahrü’l-a‘yân el-Hâc Hüseyin b. Abdullah mahzarında bâ‘is-i tahrîr-i hâze’l-kitâb Mehmed Çelebi b. Aydın’dan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müdde‘î-yi mezbûrun müteveffâ-yı merkūmun zimmetinde karz-ı şer‘î cihetinden râyicü’l-vakt dokuz yüz kırk guruş hakkı vardır. Hakkını kısmen veyâ tamamen ahz ü kabz etmediğine, hâl-i hayatında hakkını başkasına havâle etmediğine, zimmetini bi-vechin mine’l-vücûhi şer‘iye ibrâ etmediğine dâir müdde‘î-i merkūm tahlîf edilmeğin gıbbe ri‘âyeti şerâiti’l-kabûl şehâdetleri mûcebince hükmedildi. Cerâ zâlike ve hurrire fî-evâsıtı şehri Şevvâl li-sene hamse ve elf. Şühûdü’l-hâl: Ahmed Efendi el-müderris, diğer Ahmed Efendi el-kādı, Mehmed Çelebi el-kâtib, Mustafa b. Mahmud, Mehmed b. Ramazan