İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 160 Hüküm no: 139 Orijinal metin no: [29b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâcı Sinan’ın ölen Süleyman Çelebi’den alacağı olduğu Rüstem Bey b. Abdullah ve Keyvan b. Abdullah nâm kimseler meclis-i şer‘a hâzırân olup mahmiye-i Kostantıniyye mahallâtından Hacce Hatun mahallesinde bundan akdem vefât eden Süleyman Çelebi b. Musa’nın Mehmed ve Fatıma nâm sagīre evlâdına vasîyy-i muhtâr olan Mustafa Çelebi b. Muharrem mahzarında, hâmil-i hâze’l-kitâb el-Hâc Sinan b. Abdullah’dan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûr Süleyman Çelebi b. Musa hâl-i hayatı ve kemâl-i akl ve sıhhatinde bizim yanımızda müdde‘î-yi mezbûr el-Hâc Sinan b. Abdullah’a müşterâ-yı makbûz emti‘a semeninden bin elli akçe borcu olduğunu ikrâr ve i‘tirâf eyledi. Hakkını kısmen veyâ tamamen ahz ü kabz etmediğine, hâl-i hayatında hakkını başkasına havâle etmediğine, zimmetini bi-vechin mine’l-vücûhi şer‘iye ibrâ etmediğine dâir müdde‘î-i merkūm tahlîf edilmeğin gıbbe ri‘âyeti şerâiti’l-kabûl şehâdetleri mûcebince hükmedildi. Cerâ zâlike ve hurrire fî-evâsıtı Şevvâl li-sene hamse ve elf. Şühûdü’l-hâl: el-Hâc Piyale b. Abdullah, Derviş b. Sinan, Mehmed b. Hamza, Ferhad b. Abdullah, Abdulkadir b. Osman ve gayruhum