İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 167 Hüküm no: 150 Orijinal metin no: [31a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gürcü asıllı Hüseyin’in Veziriazam Osman Paşa’nın azatlısı olduğu İşbu bâ‘is-i tahrîr-i kitâb olan uzun boylu açık kaşlı elâ gözlü buğday enli ve sol kolunda rahneli ve sağ gözünde eser-i cerâhati olan Gürciyyü’l-asl Hüseyin b. Abdullah meclis-i şer‘de takrîr-i merâm edip ben, vezîriâ‘zam iken vefât eden merhûm Osman Paşa’nın mu‘takı iken bundan esbak maktûl olan beylerbeyi Mehmed Paşa[‘nın] müteferrika başı olup vefât eden Mehmed Çavuş’un karındaşı ve vârisi olan Mustafa Çavuş beni müteveffâ-yı merkūmun mücerred hizmetinde olmağile memlûkisi deyü nizâ‘ eder işbu meclis-i şer‘de ihzâr etdiği Müslümanlardan keyfiyet-i hâl suâl olunup cevâbların tahrîr olmasın taleb ederin dedikde Mahmud Bey b. Abdullah el-cündî ve Tatar İsa Bey b. Abdullah ve Hasan Bey b. Abdullah ve Pervâne Bey b. Abdullah nâm sipâhîlerden istihbâr olundukda fi’l-hakīka merhûm mezbûr Osman Paşa mezbûr Hüseyin b. Abdullah’ı silk-i mülkünde iken hasbeten lillâhi’l-azîm ve haseneten li-rûhi Rasûlihi’l-kerîm ı‘tâk ve tahrîr etdi mesfûr Hüseyin sâir ahrâr-ı asliyîn gibi hürdür deyü ihbâr etdiklerinde vâki‘ hâl gıbbe’s-suâl ketb olundu. Tahrîren fî 22 Şevvâl sene 1005. Şühûdü’l-hâl: Hürrem Çavuş b. Abdullah, Perviz Ağa b. Abdullah, Yahya Kethudâ b. Abdullah, Hüsrev Ağa b. Abdullah, Mustafa Çavuş el-mübâşir, Behram Ağa el-müteferrika, Mehmed b. Ramazan, Ferhad b. Abdullah, es-Seyyid Mahmud b. es-Seyyid Ali el-imâm ve gayruhum ve’l-hâzırîn.