İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 261 Hüküm no: 274 Orijinal metin no: [58a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Temeşvar Kadısı Osman Efendi’nin evini istiğlal yoluyla Gazi Efendi Evkafı’na sattığı Medîne-i Temeşvar kādısı fahrü’l-kuzât ve’l-hükkâm mevlana Osman Efendi b. Bilal meclis-i şer‘-i şerîfe hâzır olup hâlâ merhûm Gāzi Efendi evkāfına mütevelliye olan Fatıma Hatun bt. Mehmed kıbelinden tasdîka vekâleti bimâ hüve nehcü’s-sübût şer‘an sâbit olan Şeyhi Çelebi b. ( ) nâm kimse mahzarında şöyle ikrâr ve i‘tirâf eyledi ki, işbu akdin kendilerinden sudûruna kadar mâliki olduğu ve taht-ı tasarrufunda bulundurduğu, mahmiye-i Kostantıniyye mahallâtından Beyceğiz mahallesinde kâin, hudûdu bir tarafından mahalle-i mezbûre mescidi duvarıyla ve tarafeynden tarîk-ı âm ile, bir tarafından da Demirci Mehmed Sûfî mülküyle mahdûd bulunan cemî‘ menzilini cümle hudûdu ve kâffe-i hukūkuyla râyicü’l-vakt doksan dört bin akçe-i Osmânî semen-i mu‘ayyen-i makbûzla, mütevellî-yi sâbıkın kāim-i makāmı Mehmed Çelebi’ye bey‘ etti. Mezbûr Mehmed Çelebi dahi vakf-ı mezbûr mâlıyla ve istiğlâl maksadıyla iştirâ etti. Bâyi‘-i mesfûrun istîcârı üzere müşterî-yi mezbûr ba‘de’t-tahliye ve’t-tekābuz zeylde mezkûr senenin gurre-i Safer-i hayrından bir sene tamamına râyicü’l-vakt dokuz bin dört yüz akçe ücret-i kirâ ile icâreye verdi. Vâki‘ ikrâr mezbûr Şeyhi Çelebi tarafından vicâhen ve şifâhen tasdîk edildi. Sonra mahalle-i mezbûre imâmı mevlana Mustafa b. Mehmed meclis-i şer‘-i şerîfe gelip vekîl-i merkūm mahzarında, menzil-i mezbûrun derkine ve ücret-i kirâya îcâb ve kabûlü hâvî kefâletle kefîl olduğunu ikrâr ve i‘tirâf etti. Vâki‘ ikrâr vekîl-i merkūm tarafından bi’l-muvâcehe tasdîk edildi. Cerâ zâlike ve hurrire fî-evâsıtı Cemâdeluhrâ li-sene elf. Şühûdü’l-hâl: Fahrü’l-akrân Mehmed Çelebi tabîb-i sultânî, Mustafa Çelebi b. Ahmed, İbrahim b. Mehmed, Mehmed b. Şadi?, el-Hâc Mustafa b. Yahya, Ahmed b. Turmuş