İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 270 Hüküm no: 287 Orijinal metin no: [60b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacağı olduğu iddiasıyla Kapıcı Musa’nın vefat eden Mustafa Çelebi’nin oğlunun vasisine açtığı davanın anlaşmayla sonuçlandığı Fahrü’l-emâsil ve’l-akrân Musa b. ( ) nâm bevvâb-ı sultânî meclis-i şer‘-i şerîfe mahrûse-i Kostantıniyye’de Voynuk Şücâ‘ mahallesinde müteveffâ olan merhûm Mustafa Çelebi b. Osman nâm Dîvân-ı Hümâyûn Kâtibi’nin veled-i sagīri Hüseyin’e kıbel-i şer‘den vasî olan Yusuf Bey b. Abdullah nâm kimesne mahzarında takrîr-i kelâm edip merhûm-ı mezbûr Mustafa Çelebi’ye kasaba-i Kars’da yirmi beş bin nakd karz akçe verip ba‘dehû yirmi altı guruş ile on bir altın dahi verip cem‘an zimmetinde yirmi dokuz bin akçem olup meblağ-ı mezkûrdan on beş bin akçesini kendi bana teslîm edip zimmetinde on bin akçe ile yirmi altı guruş ve on bir altın kalmışdır deyü da‘vâ etdikden sonra kelâmını müeyyid kasaba-i merkūmede müvellâ olan Mevlana Mehmed imzâsıyla mümzâ ve hâtemiyle mahtûm hüccet-i şer‘iye ibrâz edip nazar olundukda mazmûnu kelâm-ı meşrûhuna muvâfık bulunup keyfiyet-i hâl vasîyy-i mezkûrdan istifsâr olundukda bi’l-külliye inkâr ile cevâb vermeğin müdde‘î-yi merkūmdan kelâm-ı meşrûhuna ve mazmûn-ı hüccet-i şerîfeye muvâfık beyyine taleb olundukda ahrâr-ı Müslimînden Mehmed Çelebi b. Mahmud ve İsa b. Süleyman nâm kimesneler li-ecli’ş-şehâde hâzırân olup müdde‘î-yi merkūmun kelâm-ı meşrûhuna ve mazmûn-ı hüccet-i mezkûreye muvâfık edâ-i şehâdet-i şer‘iye edip şehâdetleri hayyiz-i kabûlde vâki‘ > olmak esnâsında iken muslihûn-ı Müslimûn tavassut eyleyip beynimize sulh enfa‘ gördüklerine binâen vasîyy-i mezkûr Yusuf Bey müdde‘î-yi merkūm Musa Bey’i da‘vâ-yı mezkûresinden üç bin sekiz yüz akçeye sulh edip mezkûr Musa dahi meclis-i şer‘de merkūm Yusuf Bey muvâcehesinde bi’t-tav‘ ve’r-rızâ ikrâr edip merhûm-ı mezbûr Mustafa Çelebi zimmetinde da‘vâ etdiğim meblağ-ı merkūmu üç bin sekiz yüz akçeye sulh edip bedel-i sulh olan meblağ-ı mezkûru vasîyy-i merkūm yedinden bi’t-tamam alıp kabz eyleyip sagīr-i mezkûr zimmetini husûs-ı mezbûra müte‘allik cemî‘ de‘âvîden ibrâ-yı küllî ile ibrâ eyledim ba‘de’l-yevm benden bizzât veyâ bi’l-vâsıta meblağ-ı merkūm yirmi dokuz bin akçeye müte‘allik merhûm-ı mezbûr muhallefâtından da‘vâ ve taleb sâdır olursa lede’l-hükkâm mesmû‘a ve makbûle olmaya dedikde mukırr-ı merkūmun ikrâr-ı meşrûhu[nu] merkūm Yusuf Bey dahi bi’l-muvâcehe tasdîk etdikde vâki‘ hâl ketb olundu. Tahrîren fî-evâili Cemâziyelâhir li-sene elf. Şühûdü’l-hâl: İvaz Çavuş b. Mustafa, Mustafa b. Abdullah, Mehmed Bey b. Abdullah, el-Hâc Mustafa b. İsa, Ahmed Bey b. Turhan ve gayruhum.