İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 274 Hüküm no: 293 Orijinal metin no: [61b-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Mustafa’nın vakfa borcu olduğu Mahmiye-i Kostantıniyye mahallâtından Voynuk Şücâ‘ mahallesi imâmı mevlana Hasan b. Ahmed ve Habib b. Hamza el-müezzin ve İvaz Çavuş b. Mustafa nâm kimseler meclis-i şer‘-i şerîfe hâzırûn olup, bundan akdem mahalle-i mezbûrede vefât eden Mustafa nâm müteveffânın Hüseyin nâm sagīr oğluna kıbel-i şer‘den mansûb vasî olan ve vesâyeti bimâ hüve nehcü’s-sübût şer‘an sâbit bulunan Bevvâb-ı sultânî Yusuf Bey b. Abdullah nâm hasm-ı câhid mahzarında, merhûm Bayram? Paşa Evkāfı mütevellîsi kāim-i makāmı Şehsüvar Bey b. Abdurrahim’den sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûrun zimmetinde kāim-i makām-ı mezkûr ile yaptığı mu‘âmele cihetinden vakf-ı mesfûra râyicü’l-vakt seksen bin sekiz yüz akçe deyni vardır. Müdde‘î-i mezbûra meblağ-ı mesfûru kısmen veyâ tamamen almadığına, zimmetini bi-vechin mine’l-vücûh ibrâ etmediğine dâir yemîn verilmeğin, şehâdeten sahîhaten şer‘iyeten makbûleten ba‘de ca‘li şerâiti’l-kabûl mer‘iyeten mine’t-ta‘dîl ve’t-tezkiyeti’ş-şer‘iye şehâdetleri mûcebiyle meblağ-ı mezbûrun müteveffâ-yı mesfûrun muhallefâtından edâsına hükmedildi. Cerâ zâlike ve hurrire fî-evâili Cumâdeluhrâ li-sene elf. Şühûdü’l-hâl: Mustafa b. İlyas, Hasan b. Abdullah, el-Hâc Mustafa b. İsa, Ahmed Bey b. Turhan, Nebi b. Ahmed, Mehmed Bey b. Abdullah, Mehmed b. Ramazan el-muhzır, Mustafa b. Mahmud el-muhzır ve gayruhum