İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 294 Hüküm no: 328 Orijinal metin no: [67a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beytülmal tarafından zabtedilen Sinan Bey’e ait evin müzayede ile satıldığı Mahmiye-i Kostantıniyye mahallâtından Hadice Hatun mahallesinde vefât eden merhûm Sinan Bey b. Abdullah’ın muhallefâtına vâzı‘-ı yed olan Dârü’s-saltanati’s-seniyye mahmiye-i Kostantıniyye’de vâki‘ Beytü’l-mâl-i hâs emîni aynü’l-a‘yân Abdullah Çavuş b. Hızır meclis-i şer‘a hâzır olup müteveffâ-yı mezbûrun muhallefâtından Beytü’l-mâle intikāl eden, mahalle-i mezbûrede vâki‘, ahırı, muhavvatayı, kenîfi hâvî, hudûdu bir tarafından Pervâne b. Abdullah mülkü, bir tarafından Mihri bt. Abdullah mülkü, bir tarafından Şehri bt. Abdullah mülkü, bir tarafından da tarîk-ı âm ile mahdûd bulunan cemî‘ menzili cümle tevâbi‘i ve levâhıkı ve merâsimi ve merâfıkı ile râyicü’l-vakt on iki bin akçe semen-i mu‘ayyen-i makbûzla bâ‘isetü’s-sicil Nefise bt. Pervâne nâm hatuna bey‘ ettiğini ikrâr eyledi. Vâki‘ ikrâr, müşteriyye-i merkūme tarafından tasdîka vekâleti bimâ hüve nehcü’s-sübût şer‘an sâbit olan fahrü’l-akrân Ömer Bey b. Abdülmennan tarafından vicâhen ve şifâhen tasdîk edildi. Mubâya‘a-i mezbûre, menzil-i mesfûrun, Beytü’l-mâl emîni kâtibi fahrü’l-muharrirîn İbrahim Bey b. Abdullah ma‘rifeti ile sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyhâ üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu. Cerâ zâlike ve hurrire fî-evâili Rebî‘i’l-âhir li-sene selâse ve elf. Şühûdü’l-hâl: Mehmed b. Abdullah, Ali b. Abdullah, Kasım Bey b. Abdullah, Ahmed b. Abdullah, Mehmed b. Abdullah, Hasan b. Mustafa