İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 295 Hüküm no: 330 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehrizol beylerbeyisi Ferhad Paşa’nın ev almak için kendisine kefil olanlara borcu Şehrizol beylerbeyisi olan emîrü’l-ümerâi’l-kibâr kebîrü’l-kibâri’l-ahyâr sâhibü’l-izzi ve’l-vakār zü’l-kadri ve’l-i‘tibâr Ferhad Paşa -dâme ikbâlühû- kıbelinden ikrâr-ı âti’l-beyâna vekîl olup vekâlet-i mahkiyesi Davud b. Abdurrahman ve Mehmed b. Mustafa şehâdetleri ile hasm-ı şer‘î câhid muvâcehesinde sâbite olan Dergâh-ı [felek] iştibâh çavuşlarından aynü’l-a‘yân Mehmed Çavuş b. el-Hâc Kasım meclis-i kavîme hâzır olup Bezzâzistân-ı atik bezzâzlarından işbu bâ‘isü’s-sicil fahrü’t-tüccâr el-Hâc Ahmed b. el-Hâc Ali mahzarında bi’l-vekâle ikrâr edip müvekkilim olan müşârün-ileyh Ferhad Paşa mezkûr el-Hâc Ahmed ve mahrûse-i İstanbul’da Çeri Nasuh mahallesinde vâki‘ olup i‘tirâfı Hasan el-Katar ve Fatıma bt. Sinan ve Selime mülkleriyle mahdûd olan büyût-ı müte‘addideyi müştemil menzilimi yüz elli bin fıddî akçeye iştirâ eyleyip semen-i merkūm elân paşa-yı mûmâ-ileyh zimmetinde vâcibü’l-edâ ve lâzımü’l-kazâ deynidir. Meblağ-ı mezbûr için ben kefîl [ve] zâmin olduğumdan mâ‘adâ silahdârlar zümresinden Mustafa b. Abdullah paşa-yı mezbûrun emriyle kefîl bi’l-mâl olmuşdur dedikde mezkûr Mustafa Bey dahi hâzır olup zikr olunan yüz elli bin akçesin dahi kefîl [ve] zâmin oldum deyü i‘tirâf etdikde mezbûr Mustafa Çavuş ile Mehmed Bey vech-i meşrûh üzere vâki‘ olan ikrârları sâlifü’z-zikr el-Hâc Ahmed muvâcehesinde tasdîk etdiklerinden sonra kayd olundu. Fî-evâhiri Saferi’l-hayr sene selâse ve elf. Şühûdü’l-hâl: İftihârü’l-müderrisîn Sinan Efendi b. Pîrî Mehmed, Mevlana Ahmed Çelebi b. Mehmed el-müderris, Sefer Çelebi b. Ramazan.