İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 300 Hüküm no: 337 Orijinal metin no: [68b-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Hasan Bey’in hanımına mehir borcu olduğu Ahmed Ağa b. Abdullah ve Mehmed b. İne el-habbâz nâm kimseler meclis-i şer‘a hâzırân olup bundan akdem mahmiye-i Kostantıniyye mahallâtından Murad Bey mahallesinde vefât eden Atebe-i aliyye’deki ekmekçiler kethudâsı merhûm Hasan Bey b. Abdullah’ın vasîyy-i muhtârı olan İsmail Çavuş b. Abdullah mahzarında, merhûm-ı mezbûrun zevcesi ve vârisi Zamane bt. Abdullah nâm hatundan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûrun zimmetinde esnâ-yı nikâhında ma‘kūdun aleyh olan mehr-i müeccel cihetinden müdde‘iye-i merkūme zevcesine râyicü’l-vakt beş bin akçe deyni vardır. Hakkını kısmen veyâ tamamen ahz ü kabz etmediğine, zevcinin hâl-i hayatında hakkını başkasına havâle etmediğine, zimmetini bi-vechin mine’l-vücûhi şer‘iye ibrâ etmediğine dâir müdde‘iye-i merkūme tahlîf edilmeğin gıbbe ri‘âyeti şerâiti’l-kabûl şehâdetleri mûcebince hükmedildi. Cerâ zalike ve hurrire fî-evâili Saferi’l-muzaffer li-sene selâse ve elf. Şühûdü’l-hâl: Mahmud b. Ahmed, Mehmed b. Hamza, Mustafa b. İlyas, Ferhad b. Abdullah