İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 301 Hüküm no: 339 Orijinal metin no: [68b-5, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmal tarafından zabtedilen Muslihuddin’in mal bedelinden Mehmed b. Mehmed’e borcu olduğu Udûlden Yusuf b. Mehmed ve Ahmed b. Hamza nâm kimseler Dîvân-ı âlîye hâzırûn olup emâcid-i ekârim defterdârlar huzûrunda, bundan akdem mahmiye-i Kostantıniyye mahallâtından Balaban mahallesinde vefât eden merhûm Muslihuddin b. Abdullah’ın muhallefâtına vâzı‘-ı yed olan Dârü’s-saltanati’s-seniyye mahmiye-i Kostantıniyye’de vâki‘ Beytü’l-mâl-i hâs emîni aynü’l-a‘yân Abdullah Çavuş b. Hızır mahzarında, hâfız-ı hâze’l-kitâb fahrü’l-akrân Mehmed b. el-Hâc Mehmed’den sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûrun zimmetinde müdde‘î-yi mezkûra gümüş tel bahâsından râyicü’l-vakt altı yüz yirmi iki akçe ve ibrişim kumaş bahâsından on bir bin akçe deyni vardır. Müdde‘î-i mezbûra meblağ-ı mesfûru kısmen veyâ tamamen almadığına, zimmetini bi-vechin mine’l-vücûh ibrâ etmediğine dâir yemîn verilmeğin, şehâdeten sahîhaten şer‘iyeten makbûleten ba‘de ca‘li şerâiti’l-kabûl mer‘iyeten mine’t-ta‘dîl ve’t-tezkiyeti’ş-şer‘iye şehâdetleri mûcebiyle meblağ-ı mezbûrun edâsına hükmedildi. Cerâ zalike ve hurrire fi’t-târihi’l-mezbûr. Şühûdü’l-hâl: Es-sâbikūn