İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 316 Hüküm no: 369 Orijinal metin no: [73a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Mehmed Çavuş’un hanımına borcu olduğu Küçük Ayasofya câmi‘i imâmı es-Seyyid Mustafa b. es-Seyyid Hüseyin ve imâm Veli b. Seyfullah ve cerrâh-ı sultânî el-Hâc Murad b. Abdullah nâm kimseler meclis-i şer‘a hâzırûn olup, târih-i kitâbda vâki‘ sefer-i sultânîde vefât eden merhûm Mehmed Çavuş b. Veli’nin Ali ve Hasan nâm sagīreynine vasîyy-i muhtâr olup vesâyet-i mahkiyesi bimâ hüve nehcü’s-sübût şer‘an sâbit olan Mehmed Çelebi b. Cafer mahzarında, müteveffâ-yı mezbûrun zevcesi ve vârisi Saime Hatun bt. Mustafa Çavuş’dan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûrun zimmetinde müdde‘iye-i merkūmeye karz-ı şer‘î cihetinden lâzımü’l-edâ ve vâcibü’l-kazâ râyicü’l-vakt otuz bin akçe deyni vardır. Şehâdeten sahîhaten şer‘iyeten makbûleten ba‘de ca‘li şerâiti’l-kabûl mer‘iyeten, küllen ve ba‘zan meblağ-ı mezbûru kendisinden veyâ vekîlinden almadığına ve bi-vechin mine’l-vücûh zimmetini ibrâ etmediğine dâir müdde‘iye-i merkūme tahlîf edilmeğin şehâdetleri mûcebince hükmedildi. Tahrîren fî 19 Safer sene 1005. Şühûdü’l-hâl: el-Hâc Mehmed Çavuş b. Abdullah, Yusuf Çavuş b. Abdülmennan, Karagöz Ağa b. Abdullah, Mehmed b. Ramazan, Mustafa b. Mahmud ve gayruhum