İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 322 Hüküm no: 382 Orijinal metin no: [75a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmal tarafından zabtedilen Süleyman Ağa’nın evinin müzayede ile satıldığı Mahmiye-i Kostantıniyye mahallâtından Dâye Hatun mahallesinde vefât eden merhûm Süleyman Ağa b. Abdullah’ın muhallefâtına vâzı‘ü’l-yed olan mahmiye-i mezbûrede vâki‘ Beytü’l-mâl-i hâs emîni Mehmed Bey b. Abdülmennan ve müteveffâ-yı mezbûrun vesâyâsını tenfîze vasîyy-i muhtâr olan ve vesâyet-i mahkiyesi bimâ hüve nehcü’s-sübût şer‘an sâbit bulunan fahrü’l-akrân Ahmed Bey b. Abdülmennan ve müteveffâ-yı mezbûrun zevcesi ve vârisi Hadice Hatun kıbelinden âti’-zikr bey‘a ve kabz-ı semene vekâleti bimâ hüve nehcü’s-sübût şer‘an sâbit olan Ahmed Bey b. Mustafa nâm kimseler birlikte meclis-i şer‘a hâzırûn olup şöyle ikrâr ve i‘tirâf eylediler ki, emânet ve vesâset ve vekâlet-i mahkiyeleri hasebiyle, müteveffâ-yı mezbûrun muhallefâtında mevcûd, mahmiye-i mezbûre mahallâtından Sahaf Süleyman mahallesinde kâin, yedi tahtânî ve fevkānî hâneyi, iki sofayı, şehnişîni, su kuyusunu, cüneyneyi, ahırı, muhavvatayı ve kenîfi müştemil, hudûdu tarafeynden tarîk-ı âm ve tarîk-ı hâs ile, bir tarafından Ali Bey b. Abdullah mülkü ile, bir tarafından Cafer b. Abdullah mülkü ile mahdûd bulunan cemî‘ menzili cümle tevâbi‘i ve levâhıkıyla râyicü’l-vakt yüz altmış bin akçe semen-i mu‘ayyen-i makbûzla îcâb ve kabûlü hâvî bey‘-i bâtt-ı sahîh-i şer‘î ile bâ‘is-i tahrîr-i kitâb bevvâb-ı sultânî Hasan Bey b. Abdülvahhab’a bey‘ eylediler. Mezbûr Hasan Bey dahi menzil-i mezkûru iştirâ eyledi. Mubâya‘a-i mezbûre, menzil-i mesfûrun sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyh üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu. Tahrîren fî 10 Safer li-sene 1005. Şühûdü’l-hâl: Mustafa b. Şaban el-imâm, Habib Efendi b. el-müderris, Şükrullah el-müderris, İbrahim b. el-müezzin, Attâr Hasan b. Abdullah, el-Hâc Süleyman b. ( ), Mustafa b. İlyas, Hacı Çavuş b. ( ), Ahmed Çavuş b. Bâli, Mehmed Çelebi b. İskender, Seyfullah b. Ali el-imâm, Ali b. Hamza, Hacı Mirza b. Abdullah, Mehmed b. Ramazan ve gayruhum