İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 340 Hüküm no: 409 Orijinal metin no: [79b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferde ölen Hamza Çavuş’un borcundan dolayı evinin Fatıma Hatun’a satılması Mahmiye-i İstanbul’da Beytü’l-mâl-i hâssaya bi’l-fi‘il emîn olup bundan akdem sefer-i sultânîde vefât eden Hamza Çavuş b. Hüseyin nâm kimesnenin muhallefâtına vâzı‘ü’l-yed olan fahrü’l-akrân Mehmed Bey b. Abdülmennan meclis-i şer‘-i şerîfde bâ‘isetü’l-kitâb müteveffâ-yı mezbûrun zevcesi ve vârisesi <> olan fahrü’l-muhadderât Fatıma Hatun bt. Mehmed mahzarında ikrâr ve i‘tirâf edip müteveffâ-yı mezkûrun cümle-i muhallefâtı ancak menzil-i âti’z-zikre münhasıra olup ve ale’n-nehci’ş-şer‘î üzerine sâbit olan düyûn-ı müteferrikası menzil-i mezkûrun kıymetinden ziyâde olup taksîm-i guremâ lâzım gelmeğin mahmiye-i mezbûrede Mustafa Paşa-yı atik mahallesinde vâki‘ hudûdunun bir tarafı merkūme Fatıma Hatu>n mülküne ve bir tarafı Abdüllatif Çelebi b. Mahmud mülküne ve tarafeyn-i âhareyni Kabil Kethudâ mülkü ile tarîk-i âmma müntehî olup bir bâb beyt-i süflî ve sofayı ve bi’r-i mâyı ve kenîfi ve cüneyneyi ve hâricinde iki bâb beyt-i ulvî ve ıstablı ve muhavvatayı müştemil olan menzili mirâren ve müte‘addiden mecâlis-i tâlibîn ve râgıbîne arz olundukda ragabât-ı nâs münkatı‘a oldukdan sonra mezbûre Fatıma Hatun üzerinde seksen bin akçede karâr edip menzil-i merkūm cemî‘ tevâbi‘ ve levâhıkıyla mezbûre Fatıma Hatun’a meblağ-ı merkūm seksen bin akçeye bey‘-i bâtla bey‘ edip kabz-ı semen ve teslîm-i müsemmen kıldım dedikde mukırr-ı mezbûru ikrâr-ı meşrûhunda mukarrun lehâ el-merkūme Fatıma vicâhen tasdîk ve şifâhen tahkīk edicek mâ-vaka‘a bi’t-taleb ketb olundu. Tahrîren fi’t-tâsi‘ ve’l-ışrîn fî-şehri Rebî‘i’l-âhir li-sene hamse ve elf. Şühûdü’l-hâl: Kıdvetü’l-akrân Mehmed Efendi b. Abdurrahman, Mevlana b. Ahmed el-hatîb, Şaban b. Hamza el-müezzin, Mustafa b. Yusuf el-müezzin, Mehmed b. Ramazan, Mustafa b. Mahmud, Ahmed Dede b. Abdullah, Mehmed Bey b. Abdullah el-cündî, Hüseyin Bey b. Mehmed, Ali b. Ahmed.