İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 349 Hüküm no: 419 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğri kalesi fethinde şehid olan Behram Bey’in muhallefatı Mehmed Bey b. Abdullah meclis-i şer‘-i şerîfi-i râsihü’l-erkân ve mahfil-i dîn-i münîf-i mümehhidü’l-bünyâna gelip takrîr-i kelâm edip mahmiye-i mezbûre mahallâtından Kasab İlyas mahallesinde sâkin olup işbu târih-i kitâbda fethi müyesser olan kal‘a-i Eğri tahtında şehîd olan merhûm Behram Bey b. Abdullah’ın zâhirde vâris-i ma‘rûfu olmamağla cümle-i muhallefâtı ve mahalle-i mezbûrede vâki‘ olup lede’l-ahâli ve’l-cîrân ma‘lûmü’l-hudûd ve’l-müştemilât olan mülk menzili Beytü’l-mâl-i mezbûr için kabz olunması lâzım iken hâlâ Emine bt. Abdullah nâm hatun muhallefâtına ve zikr olunan menzile bi-gayrı vech-i şer‘î vaz‘-ı yed etmişdir. Üzerine varılıp bi-hasebi’ş-şer‘-i şerîf mezbûre Emine’nin yedi ref‘ olunup muhallefât-ı mezkûre ve menzil-i mezbûr beytü’l-mâl-i mastûr için kabz olunmasını taleb ederin dedikde mahalle-i mezbûreye varılıp akd-i meclis olunup emîn-i mûmâ-ileyh mezkûre Emine Hatun’u mahfil-i kazâya ihzâr ve mahzarında takrîr-i merâm edip müteveffâ-yı mezkûr Behram Bey’in zâhirde vâris-i ma‘rûfesi olmamağla cümle-i muhallefâtı ve menzil-i mezkûru Beytü’l-mâl-i mezkûr için kabz olunması lâzım iken cümle muhallefâtına ve menzil-i mezkûre mesfûre Emine Hatun bi-gayrı vech-i şer‘î vaz‘-ı yed etmişdir. Yedi kasr ve izâle olunup emânetim hasebiyle muhallefât ve menzil Beytü’l-mâl-i merkūm için kabz olunmasını taleb ederin suâl olunsun dedikde gıbbe’s-suâl mezbûre Emine Hatun cevâbında müteveffâ-yı merkūm Behram Bey b. Abdullah’ın li-ebeveyn er karındaşı Yanko nâm zimmînin sulbiye kızı ve müteveffâ-yı mezbûrun alâ vechi’l-inhisâr vârisesiyim verâsetim hasebiyle muhallefât ve menziline vaz‘-ı yed etdim mûrisim müteveffâ-yı merkūmun hâl-i hayatda ve kemâl-i akl-ı sıhhatinde dahi ben li-ebeveyn er karındaşı kızı alâ-vechi’l-inkâr vârisesi idiğime ikrâr-ı sahîh etdi dedikde emîn-i mezbûr Emine Hatun’un vech-i meşrûh üzere vârise idiğini inkâr edicek mezbûre Emine Hatun’dan sıdk-ı makāline muvâfık beyyine taleb olundukda ahrâr-ı Müslimînden olup bi’l-fi‘il Ayasofya-i kebîr Evkāfı’na mütevellî olan Ahmed Efendi b. Mehmed ve mahalle-i mezbûre imâmı Mevlana Salih b. Abdurrahman ve Sefer Bey b. Abdurrahman ve Kasım Bey b. Abdullah ve Hızır b. Abdullah nâm kimesneler mahfil-i kazâda li-ecli’ş-şehâde hâzırûn olup istişhâd olundukda fi’l-hakīka müteveffâ-yı merkūm Behram Bey b. Abdullah’a hâl-i hayat ve kemâl-i akl-ı sıhhatinde bizim yanımızda kirâren ve mirâren mezbûre Emine Hatun bt. Abdullah benim li-ebeveyn er karındaşım kızıdır ve alâ-vechi’l-inhisâr bana vârisedir cümle terekeme li-ebeveyn er karındaşım kızı mezbûre Emine Hatun’dan gayri müstahıkka yokdur deyü ikrâr etdi, minvâl-i meşrûh üzere ikrârına şâhidleriz şehâdet-i şer‘iye dahi ederiz deyü edâ-i şehâdet-i şer‘iye etdiklerinde gıbbe şerâiti’l-kabûl makbûle olup mâ-vaka‘a bi’t-taleb ketb olundu. Tahrîren fî-evâsıtı Cemâziyelevvel sene hamse ve elf. Şühûdü’l-hâl: Şaban Bey b. Ali el-mütevellî, Ali b. Bali, Halil İbrahim, Hızır b. İlyas el-müezzin, Hüseyin b. Abdullah, Ahmed b. Ali, Kılıç Bey b. Ali, Mustafa b. Abdullah, Kurd b. Ali, Himmet b. Mehmed, Mustafa b. Mehmed ve gayruhum.