İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 351 Hüküm no: 424 Orijinal metin no: [82a-4, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen ve muhallefatı Beytülmal tarafından zabtedilen Mustafa b. Mehmed’in evinin müzayede ile satıldığı Mahmiye-i Kostantıniyye hısnı ebvâbından Kumkapısı kurbündeki Hatuniye mahallesinde vefât eden Mustafa b. Mehmed nâm cündinin muhallefâtına vâzı‘-ı yed olan, mahmiye-i mezbûrede vâki‘ Sipâhîoğlanları zümresine mahsûs Beytü’l-mâlin emîni Yahya Halîfe b. Abdullah el-cündî meclis-i şer‘a hâzır olup müteveffâ-yı mezbûrun muhallefâtından olan, mahalle-i mezbûrede kâin, dâhilî ve hâricî muhavvatalı, dâhiliyesinde şehnişînli beş odayı, su kuyusunu, sofayı, kenîfi ve mahtabı ve iki ağacı müştemil, hâriciyesi iki fevkānî odayı, bir tahtânî odayı, sofayı, kenîfi, iki dükkânı, dâhil-i bâb ahırı muhtevî, hudûdu bir tarafından Arabacıbaşı Yusuf Vakfı, bir taraftan Muhzırbaşı Vakfı, bir taraftan ( ) nâm hatun mülkü, bir tarafından tarîk-ı âm ile mahdûd bulunan cemî‘ menzili cümle tevâbi‘i ve levâhıkıyla râyicü’l-vakt seksen beş bin akçe semen-i mu‘ayyen-i makbûzla îcâb kabûlü, teslîm tesellümü hâvî bey‘-i bâtt-ı sahîh-i şer‘î ile umdetü’l-havâs ve’l-mukarrebîn sâhibü’l-izzi ve’t-temkîn Atebe-i aliyye’de kilercibaşı olan Süleyman Ağa b. Abdulmuin kıbelinden iştirâya vekâleti Mustafa Çavuş b. Mehmed ve Seyid b. Mehmed’in şehâdeti ile bimâ hüve nehcü’s-sübût şer‘an sâbit olan bâ‘is-i tahrîr-i kitâb bevvâb-ı sultânî Süleyman Ağa b. Abdulmuin’e bey‘ ettiğini ikrâr eyledi. Mezbûr Hüseyin dahi müvekkil-i müşârün-ileyhi için menzil-i mezkûru iştirâ eyledi. Vâki‘ ikrâr vekîl-i mezbûr tarafından vicâhen ve şifâhen tasdîk edildi. Mubâya‘a-i mezbûre menzil-i mesfûrun sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyh Süleyman Ağa üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu. Fî 11 Cemâziyelâhire sene 1005. Şühûdü’l-hâl: Umdetü’l-müderrisîn İbrahim Efendi b. Ali, Mustafa Çavuş b. Mehmed, Seyid Mehmed b. Seyid Hasan, İsa Bey b. el-Hâc Mehmed el-mütevellî, Mehmed b. Ramazan ve gayruhum