İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 363 Hüküm no: 445 Orijinal metin no: [85a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Pîrî’nin Tabur muhârebesinde şehit olan Defterdar Abdi Efendi’de olan alacağı İşbu bâ‘is-i tahrîrü’l-kitâb kal‘a-i Eğre kurbünde vâki‘ Tabur muhârebesinde şehîd olan Defterdâr merhûm Abdi Efendi adamlarından Mehmed Bey b. Pîrî nâm kimesne meclis-i şer‘-i şerîfde Atebe-i aliyye’de bi’l-fi‘il Başdefterdâr olan umdetü’l-emâcid ve’l-ekârim câmi‘ü’l-mehâmid ve’l-mekârim zü’l-kadri’-râsih ve’ş-şerefi’ş-şâmih el-muhtas bi-mezîdi inâyeti’l-meliki’l-Mennân Mahmud Efendi b. ( ) hazretleri kıbel-i âlîlerinden husûs-ı âti’z-zikre vekîl olup nehc üzere hasm-ı şer‘î mahzarında vekâleti sâbite olan ebnâ-i sipâhîyândan yüz yirminci bölükde Mustafa Bey b. Abdullah mahzarında takrîr-i merâm edip müteveffâ-yı merkūm Abdi Efendi hâl-i hayatında işbu meclis-i şer‘de hâzır olan Tuğkeş Ali Bey b. Hüseyin’den istikrâz etdiği kırk bin akçe mukâbelesinde kendi mâlından bir mikdâr esbâb ve benim mâlımdan işbu meclis-i şer‘de müşârün-ileyhâ [müşâhede] olan Mısır raht-ı mükemmeli ve tavşan kürklü uzun yenli bir kırmızı ferâcemi ve çirasetli düğmeli kırmızı atlas kaftanımı ve bir sarı kemhâ kaftanımı ve çiraset düğmeli bir mor kadife kaftanımı ve gümüş düğmeli bir kırmızı çuka [i]brişimi ve bir kırmızı çuka dikdiğimi ve bir kılıç kemerin ve sîm halkalı bir kırmızı tekbendemi benim rızâm ile mezbûr Ali Bey’de rehn vaz‘ edip vefâtından sonra zâhirde vâris-i ma‘rûfu olmamağın mezbûr Ali Bey’de olan muhallefâtı Beytü’l-mâl tarafı için zabt olunup benim mülküm olan eşyâ-i ma‘hûde-i mezkûreye dahi vekîl-i mezbûr Mustafa Bey benim vech-i şer‘î vaz‘ edinmiş [bî vechi şer‘î vaz‘-ı yed etmiş idi] yedi izâle olunmasın taleb ederin suâl olunsun dedikde gıbbe’s-suâl vekîl-i mezbûr cevâbında mezbûr Mehmed Bey iddi‘â etdiği eşyâ-i hâzıra-i mezkûreyi müteveffâ-yı merkūmun olmağın vaz‘-ı yed edip Beytü’l-mâl için kabz eyledim mezbûr Mehmed Bey’in mülkü idiğin bilmem deyü inkâr edip müdde‘î-yi merkūmîne sıdk-ı makāline beyyine taleb olundukda Üveys Çavuş b. el-Hâc Mahmud ve Mehmed Bey b. Abdüsselam es-Sellâhî ve Yusuf b. Memi meclis-i şer‘a li ecli’ş-şehâde hâzırûn olup fi’l-vâki‘ vekîl-i mersûm vaz‘-ı yed edip müdde‘î-yi merkūm i‘tir[â]f ve taleb etdiği eşyâ-i hâzıra-i ma‘hûdeyi müteveffâ-yı merkūm Abdi Efendi müdde‘î-yi mezbûr rızâsıyla hâl-i hayatında istikrâz etdiği kırk bin akçe mukābelesinde kendi esbâbı ile mezbûr Ali Bey’de rehn vaz‘ etdi. Eşyâ-i mezkûre müdde‘î-yi mezkûrun mülk-i mahzı ve hakk-ı sırfıdır bu husûsa şâhidiz şehâdet dahi ederiz gıbbe’t-ta‘dîl şehâdetleri makbûle olup kayd olundu. Fi’t-târihi’l-mezbûr Şühûdü’l-hâl: Abdi Bey b. Lutfi, Hasan Çelebi b. Ali, Mehmed b. Abdi, Mehmed b. Murad el-bevvâb, Ahmed b. Osman, Arslan b. Hüseyin.