İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 366 Hüküm no: 451 Orijinal metin no: [86a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Yusuf’un kölesini azat ettiği Hasan Bey b. Halil ve Mehmed Çelebi b. Mehmed nâm kimseler meclis-i şer‘a hâzırân olup vilâyet-i Rumel-i ma‘mûrede vâki‘ Niğbolu kazâsında bundan akdem vefât eden merhûm Mehmed Bey b. Yusuf’un zevcesi ve vârisi ve müteveffâ-yı mezbûrun Abdülbâki ve Salih Mehmed nâm sagīr oğullarının vasiyye-i şer‘îsi Âişe bt. Mehmed kıbelinden husûs-ı âti’z-zikre vekâleti bimâ hüve nehcü’s-sübût şer‘an sâbit olan Mustafa Çavuş b. Mehmed’in mahzarında, açık kaşlı, elâ gözlü, orta boylu, Rusiyyü’l-asl hâmil-i kitâb Todori v. Yani’den sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûr hâl-i hayatında ve kemâl-i akl ve sıhhatinde müdde‘î-yi mezbûr abd-i memlûk-i mevsûfunu hasbeten lillâhi’l-azîm âzâd ve tahrîr etti. Şehâdeten sahîhaten şer‘iyeten makbûleten ba‘de ca‘li şerâiti’l-kabûl mer‘iyeten şehâdetleri mûcebince ıtkına hükmedildi. Abd-i mezbûr bu sûretle sâir ahrâr-ı asliyîn-i mükellefîn gibi hür oldu. Cerâ zâlike ve hurrire fî-evâhiri Cumâdelâhire li-sene hamse ve elf. Şühûdü’l-hâl: Mehmed Çavuş b. Mehmed, Hüseyin b. A[bdullah], Mehmed b. Mehmed, Ahmed b. A[bdullah], Mustafa b. Ahmed, Mehmed b. Ramazan ve gayruhum