İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 387 Hüküm no: 471 Orijinal metin no: [91a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğri kalesinde vefat eden Nurullah Çavuş’un Gürcü asıllı cariyeyi karısına hibe etmiş olduğu Mahrûse-i İstanbul’da Mesih paşa (…) olan kal‘a-i Eğri altında vefât eden merhûm Nurullah Çavuş b. Ramazan nâm kimesnenin zevcesi ve vârisesi Mâhırânâ Hatun bt. Abdullah tarafından husûs-ı âti’z-zikre vekîl olup vekâleti hasm-ı şer‘î mahzarında bimâ hüve nehcü’s-sübût şer‘an sâbite olan Dergâh-ı âlî bevvâblarından Hasan Bey b. Abdullah meclis-i şer‘-i şerîfde müteveffâ-yı mezbûr Nurullah Çavuş’un sulbî oğlu Sefer nâm sagīre kıbel-i şer‘den vasî nasb olunan Emrullah Çavuş b. Armağan mahzarında bi’l-vekâle takrîr-i da‘vâ edip müteveffâ-yı mezbûr müvekkilem mezbûre Mâhırânâ Hatun’u tezevvüc etdiği zamanda leyle-i zifâfında Gürciyyetü’l-asl Hümâ bt. Abdullah nâm çengi câriyesini mezbûr müvekkileme hibe ve temlik edip müvekkilem dahi kabûl ve kabz edip ile’l-ân tasarrufundadır. Câriye-i mezbûre merkūme müvekkilemin mülk-i mahzı ve hakk-ı sırfıdır. Vâki‘ hâl vasîyy-i mezbûrdan suâl olunsun dedikde gıbbe’s-suâl ve akībe’l-inkâr ve’l-iştişhâd udûl-i Müslimînden Pîrî Çavuş b. Mustafa ve Sefer Bey b. Hüseyin ve Mustafa Bey b. Abdullah nâm kimesneler meclis-i şer‘a li ecli’ş-şehâde hâzırûn olup istişhâd olundukda fi’l-vâki‘ müteveffâ-yı mezbûr hâl-i hayat ve kemâl-i sıhhatinde zevcem mezbûre Mâhırânâ Hatun Gürciyyetü’l-asl Hümâ nâm <> çengi câriyemi mezkûr mülkü deyü hibe ve temlik etdim. Mezbûr dahi kabûl ve kabz eyledi deyü ikrâr ve i‘tirâf eyledi. Bu husûsa şâhidleriz şehâdet dahi ederiz dediklerinde ba‘de’t-ta‘dîl şehâdetleri hayyiz-i kabûlde vâki‘ oldukdan sonra kayd olundu. Fî-evâhiri Receb li-sene hamse ve elf. Şühûdü’l-hâl: Ahmed Ağa b. Abdullah, Mustafa b. Abdullah, Ahmed b. Abdullah, Yusuf b. Abdullah.