İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 408 Hüküm no: 510 Orijinal metin no: [97a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğri kalesinden dönüp vefat eden Ömer Çelebi’nin Mehmed Ağa’ya olan borcunun muhallefatından talep edilmesi Atebe-i aliyye’de Hâssa Beytü’l-mâl Mehmed Ağa b. Abdüddâim tarafından husûs-ı âtîye Mehmed b. Sefer ve Mehmed b. Ahmed şehâdetleri ile ale’n-nehci’ş-şer‘î vekâleti sâbite olan Sefer b. Hızır meclis-i şer‘-i şerîfde mahrûse-i İstanbul’da Sancakdâr Hayreddin mahallesinde sâbıkā vefât eden Mehmed Çelebi’nin sagīre kızları Fatıma ve Rabia’nın vasiyye-i şer‘iyeleri olan Muhsine Hatun bt. Mehmed tarafından kaziyye-i âti’l-beyâna nehc-i şer‘î üzere sâbitü’l-vekâle olan Mustafa Efendi b. Mehmed el-müderris (…) li-üm ammileri ve vârisleri olup kal‘a-i Eğre’den (…) [97b] vesâyeti hasebiyle vaz‘-ı yed etmişdir. Müvekkil-i mûmâ-ileyh Mehmed Ağa’nın karz-ı şer‘îden müteveffâ-yı merkūm Ömer Çelebi üzerinde olan on bin akçesini vekâletim hasebiyle muhallefât-ı müteveffâdan taleb ederim suâl olunsun dedikde gıbbe’s-suâl müşârün-ileyh Mustafa Efendi mezbûr Ömer Çelebi vefât etdiğini ve meblağ-ı müdde‘â-yı merkūm üzerinde olduğunu inkâr edicek müdde‘î-yi mezbûrun sıdk-ı makāline beyyine taleb olundukda mahalle-i merkūme sâkinlerinden Sirkeci Rıdvan Bey b. Abdullah ve Sipâhîoğlanlarından Mahmud b. Mehmed ve Mehmed b. Ali meclis-i şer‘a hâzırûn olup mezbûr Ömer Çelebi b. Hasan Çelebi kal‘a-i Eğri’den dönüp mahmiye-i Belgrad’da bizim yanımızda târih-i kitâb Rebî‘ülâhir’inin evvel gününde vefât etdi (…) namazını kılıp huzzâr-ı Müslimde defnetdik deyü makām-ı şehâdetde ihbâr etdiklerin vâki‘ hâl gıbbe’t-taleb ketb olundu. Tahrîren fi’l-âşir min-Şa‘bân li-sene hamse ve elf. Şühûdü’l-hâl: Hüseyin b. Yahya el-imâm, Mustafa b. Mehmed el-hatîb, Mustafa b. Muharrem el-kâtib, Mahmud b. Pîrî, Mustafa b. Mehmed el-müezzin ve gayruhum.