İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 413 Hüküm no: 520 Orijinal metin no: [99a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesine Beytülmal tarafından el konulan Emine’nin evinin müzayede ile satıldığı Mahmiye-i Kostantıniyye mahallâtından Karabaşoğlu mahallesinde bundan akdem vefât eden Emine bt. Abdullah’ın muhallefâtına vâzı‘-ı yed olan, mahmiye-i mezbûrede vâki‘ Beytü’l-mâl-i hâssın emîni fahrü’l-akrân Mehmed Çavuş b. Abdullah meclis-i şer‘a hâzır olup müteveffât-ı mezkûrenin muhallefâtı dâhilindeki, mahalle-i mesfûrede kâin, tahtânî iki hâneyi, iki sofayı, su kuyusunu, kenîfi ve muhavvatayı müştemil, hudûdu bir tarafından İsmihan bt. Abdullah mülkü, bir tarafından Hasan Bey b. Abdullah mülkü, bir tarafından Muhzır Mehmed mülkü, bir tarafından da tarîk-ı âm ile mahdûd bulunan cemî‘ menzili cümle tevâbi‘i ve levâhıkıyla îcâb kabûlü ve teslîm tesellümü hâvî bey‘-i bâtt-ı sahîh-i şer‘î ile râyicü’l-vakt yedi bin beş yüz akçe semen-i mu‘ayyen-i makbûzla hâmil-i hâze’l-kitâb Rıdvan b. Abdullah’a bey‘ ettiğini ikrâr eyledi. Mezbûr Rıdvan b. Abdullah dahi menzil-i mezbûru kendi mâlıyla ve li-nefsihî iştirâ eyledi. Vâki‘ ikrâr müşterî-yi merkūm tarafından bi’l-muvâcehe tasdîk edildi. Mubâya‘a-i mezbûre menzil-i mesfûrun sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyh üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu. Cerâ zâlike ve hurrire fi’l-yevmi’s-sâbi‘ ışrîn min-Ramazan li-sene hamse ve elf. Şühûdü’l-hâl: Hızır b. A[bdullah], Mehmed b. A[bdullah], Süleyman b. A[bdullah], Mustafa Bey b. Ahmed, Ferhad b. A[bdullah], Mustafa b. A[bdullah] ve gayruhum