İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 64 Hüküm no: 9 Orijinal metin no: [2-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hilal görülünce Ramazan’ın ilk gününün minarelerde kandil yakılarak duyurulması İ‘lân-ı Ramazan husûsuna dâir tezkire-i sâmiye-i Sadâret-i uzmâ Fazîletlü efendim hazretleri,, İşbu şehr-i Şa‘bân-ı şerîfin gurresi yevm-i Salı’dan sâbit olmak hasebiyle bu Çarşamba gecesi hilâl-i mes‘adet-iştimâl-i Ramazan müşâhede olduğu hâlde Çarşamba ve rü’yet vukū‘ bulmadığı takdîrce Perşembe günü sıyâma ibtidâr olunmak üzere bi’l-cümle cevâmi‘ ve mesâcid-i şerîfe minârâtının îkād-ı kanâdîl ile tezyîn ve tenvîr kılınması husûsuna dâir vârid olan i‘lâm-ı fâzılâneleri huzûr-ı âlî-i cenâb-ı pâdişâhîye lede’l-arz ol vechile icrâ-yı îcâbına irâde-i isâbet-âde-i hazret-i hilâfet-penâhî müte‘allik ve şeref-sudûr buyurulmuş olmağla ale’t-takdîreyn i‘lân-ı şehr ve îfâ-yı usûl-i mu‘tâdeye himmet eylemeleri siyâkında tezkire-i sicil terkīm kılındı. Fî 29 Şa‘bân sene [1]284 ve 4 Kânûn-ı sânî sene [12]81. [3 ve 4. sayfalar boştur]