İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 65 Hüküm no: 11 Orijinal metin no: [5-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dersaadet’in emlak tahriri tamamlanmış olsa da yeni ortaya çıkan değişikliklerin ilgili daire ve nezaretlere görevliler tarafından bildirilmesi Fazîletlü efendim hazretleri,, Dersa‘âdet’in ve levâhıkının tahrîr-i emlâki hitâm bulmuş ise de vukū‘âtın biraz müddet daha kaydına ve mu‘âmelâtının tesviyesine başlanılmadığı hâlde tebdîlâtdan dolayı kuyûd-ı mevcûdeden istifâde olunamayarak ve esnâ-yı tahrîrde olan heyetde kalan ve muahharan tahavvül eden veyâhûd ırsen ve ferâgan ve vefâen âhar kesân uhdesine intikāl eyleyen veyâ ashâbının vefâtıyla mahlûl olan mahaller bi’t-tab‘ bilinemeyerek tekrar tahrîre ihtiyâc hâsıl olacağından ba‘de’t-tahrîr vukū‘ bulup ba‘demâ dahi vukū‘ bulacak olan inşâât-ı külliye ve cüz’iyeye Ticâret Nezâret-i celîlesi idâresinde olan Ebniye Dâiresi’nin ve mahlûlâta Evkāf-ı hümâyûn hazînesinin ve muhterik ve münhedim olan mesâkin ve dekâkîn vesâir mevâki‘a eimme-i mahallât ile esnâf rüesâsının ve ferâğ ve intikāle mehâkim-i şer‘iyenin ma‘lûmâtı olacağı cihetiyle defâtir-i mahsûsasında kayıdları tesviye olunmak üzere bu makūle tebeddülâtın vukū‘-ı târihleri ve mevâki‘inin numaraları musarrah olduğu hâlde bâ-ilmühaber Tahrîr İdâresine ihbâr olunması lüzûmu atûfetlü Subhî Beyefendi hazretleri tarafından bi’l-ihtâ[r] sûret-i hâl Meclis-i Vâlâ’da dahi münâsib görünmüş ve keyfiyet Ticâret ve Evkāf-ı hümâyûn nezâret ve Zabtiye müşîriyet-i celîlelerine ve Şehremânet-i behiyesine bildirilmiş olmağla ferâğ ve intikāl hakkında ber-vech-i muharrer idâre-i mezkûreye ma‘lûmât-ı lâzıme verilmesi husûsunun dahi taraf-ı fâzılânelerinden nüvvâba tenbîhine himmet buyurulması siyâkında tezkire-i hulûsverî terkīmine ibtidâr olundu. Fî 27 Rebî‘ülâhir sene 1282 ve fî 6 Eylül sene 1281.