İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 81 Hüküm no: 35 Orijinal metin no: [16-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mecidi ve Osmani nişan sahibi olanların vefatları durumunda vârisleri tarafından nişanların iadesi usulüne riayet edilmesi Nişân emri Melek Paşa hafîdi Ali Haydar el-kādî be-Dârü’l-hilâfeti’l-aliyye fî-gurreti L sene [1]284 Me’mûrîn-i Devlet-i aliyye ve bendegân-ı saltanat-ı seniyyeden Mecîdîye nişân-ı zî-şânını hâmil bulunanların ba‘zılarının irtihâlleri haber alınmayarak nişânları familyaları yedlerinde kalmakda olduğuna ve müstağnî-i îzâh olduğu üzere vefeyât vukū‘unda kalacak Mecîdîye nişân-ı âlîlerinin istirdâdı nizâmı iktizâsından bulunduğuna mebnî taraf-ı şer‘-i enverden tereke tahrîrine me’mûr olacaklar ba‘de ezîn vefâtı vukū‘ bulanların Mecîdîye ve Osmânî nişânı olup olmadığını suâl ve tahkīk eylemek ve nişânı olduğu hâlde veresesinden ahz eyleyerek Bâbıâlî’ye gönderilmesi için mensûb olduğu mahâlde i‘tâ eylemek üzere keyfiyetin i‘lân ve tenbîhine dâir nişân-ı hümâyûn kaleminden verilen tezkire üzerine fî 10 R sene [12]83 târihiyle taraf-ı sâmî-i Fetvâ-penâhîye vesâir îcâb eden mahallere tezâkir-i sâmiye yazılmış ise de bu usûle şimdiye kadar ri‘âyet olunamamış ve hâmil-i nişân olup da vefât edenlerin nişânları vereseleri yedlerinde kalıp bilâhare bedestende ve elden köşe sarrâflarına füruht olunmakda bulunmuş ve geçen gün Hâssa ordu-yı hümâyûnu muhâsebecisi esbak merhûm Fevzi Efendi’nin dördüncü rütbe-i nişânı köşe sarrâflarına satılır iken me’mûru Muhzır Râşid Ağa tesâdüf ederek veresesi yedinden ahz ve istirdâd kılınmış ve bu ise nizâm-ı müessesinin hilâfı ve kuyûdunun teşvîşine bâdî olup bilâhare Hazîne-i celîleyi ızrârı müeddâ olacağından bundan böyle her kangı dâireden olur ise olsun tereke tahrîrine me’mûr olacak efendilerin evvel be-evvel müteveffânın nişânı olup olmadığını suâl etmek ve olduğu sûretde veresesinden ahz edilerek Bâbıâlî’ye gönderilmek üzere mensûb olduğu mahalle i‘tâ eylemeleri için sadreyn ve İstanbul kādısı efendiler hazerâtıyla evkāf-ı hümâyûn müfettişi ve beytü’l-mâl kassâmı ve bilâd-ı selâse mahkemelerine başka başka ekîden tenbîh ve ma‘lûmât verilmesi için nişân-ı hümâyûn kaleminden mektûbî-i hazret-i Fetvâ-penâhî odasına işbu ilmühaber takdîm kılındı. Fî 5 Zilka‘de sene [12]84. Teşrîfâtî-i Dîvân-ı hümâyûn