İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 97 Hüküm no: 57 Orijinal metin no: [29-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Basılmış olan Kitabü’l-icâre’nin hükümlerine göre amel edilmesi Kitâbü’l-icârenin düstûrü’l-amel tutulması A‘lemü’l-ulemâi’l-mütebahhırîn efdalü’l-fudalâi’l-müteverri‘în yenbû‘u’l-fazli ve’l-yakīn keşşâfü’l-müşkilâti’d-dîniye hallâlü’l-mu‘dılâti’l-yakīniye miftâhu künûzi’l-hakāyık messâhu rumûzi’d-dekāyık el-mahfûzu bi-sunûf-i avâtıfi’l-meliki’l-a‘lâ bi’l-fi‘il şeyhülislâm ve müfti’l-enâm olup murassa‘ Osmânî nişân-ı hümâyûnumla birinci rütbe Mecîdî nişân-ı zî-şânını hâiz ve hâmil olan Mevlânâ Hasan Fehmi Efendi -edâmallâhu te‘âlâ fezâilehû- tevkī‘-i refî‘-i hümâyûnum vâsıl olucak ma‘lûm ola ki, ma‘lûm-ı fazîlet-melzûmları olduğu üzere memâlik-i mahrûse-i şâhânemin her tarafında ma‘mûlün-bih olmak üzere bu kerre tertîb ve te’lîf kılınmış olan Kitâbü’l-icâre resîde-i hitâm bulmuş olduğundan taraf-ı eşref-i pâdişâhâne[ye] lede’l-arz mutazammın olduğu ahkâmın düstûrü’l-amel tutulması husûsuna irâde-i seniyye-i mülûkânem ta‘allukuyla hatt-ı hümâyûn-ı şevket-makrûn-ı şehriyârânem sahîfe-pîrâ-yı sudûr olmuş ve kitâb-ı mezkûrun nusah-ı matbû‘asından bir nüshası gönderilmiş olmağın sen ki mevlânâ-yı müşârün-ileyhsin zikrolunan kitâbın hâvî olduğu ahkâmın gerek Dersa‘âdet’imde ve gerek taşralarda bulunan mehâkim-i şer‘iyede mer‘iyyü’l-icrâ tutulması zımnında iktizâ edenlere teblîgāt-ı lâzımenin îfâsı zımnında Dîvân-ı hümâyûnumdan işbu emr-i celîlü’l-kadrim ısdâr ve i‘tâ olundu, ona göre icrâ-yı iktizâsına bezl-i cell-i himmet eyleyesin. Tahrîren fi’l-yevmi’l-hâdî ve’l-işrîn min-şehri Rebî‘ülevvel li-sene seb‘a ve semânîn ve mieteyn ve elf.